Зеленский: "Трамп жамоаси билан Украинадаги уруш тезроқ тугайди"

^{Фото: Getty Images}
Доналд Трамп бошқаруви остида Украинадаги уруш тезроқ тугайди, деди Украина президенти Володимир Зеленский.

«Албатта, энди Оқ уйни бошқарадиган бу жамоа сиёсати билан уруш тезроқ тугайди. Бу уларнинг ёндашуви, жамиятга берган ваъдаси ва улар учун бу ҳам жуда муҳим», деди у.

Украина раҳбари ўзи ва Трамп ўртасида конструктив ҳамкорлик юзага келганини ва Украина томони дунё келажаги бўйича ўз позициясини аниқ ифодалаш имконига эга эканлигини таъкидлади.

«У [Трамп] бизнинг позициямиздан хабардор ва унга қарши экани ҳақида ҳеч нарса эшитмадим», деб таъкидлади президент.

Зеленский, шунингдек, «уруш тугайди, аммо аниқ сана йўқ», деб таъкидлади. Шу билан бирга, у Украина учун «адолатли тинчлик» муҳимлигини таъкидлади.

Трамп Украинага Россия билан музокараларда иштирок этиш талабини қўйганми деган саволга жавоб берар экан, Зеленский ҳам украиналиклар, ҳам шахсан ўзи АҚШ, Трамп, Байден ва Европа етакчилари билан музокараларда «Ўтир ва тингла» риторикаси иш бермаслигини исботлаганини айтди.

Эслатиб ўтамиз, Доналд Трамп сайловолди кампанияси давомида Украинадаги урушни имкон қадар тезроқ «тўхтатиш» кераклигини айтган эди. Республикачига кўра, унинг маъмурияти асосий эътиборни Россия-Украина урушига қаратади ва уни тугатиш йўлларини излайди.

Трампнинг сайловдаги ғалабасидан сўнг оммавий ахборот воситаларида турли хил назариялар пайдо бўлди – асосийларидан бири Украина ҳудудий ён босишга мажбур бўлиши мумкинлиги эди. Оммавий ахборот воситалари ёзган бошқа эҳтимолий вариантлар орасида НАТОга 20 йил давомида аъзо бўлишдан бош тортиш ҳам бор. “Замин” янгиликларини “Facebook”да кузатиб боринг