Дунёда унумсиз ер майдонлари Антрактида майдонидан ошиб кетди

^{Фото: Fayez Nureldine/AFP/Getty Images}
Потсдам иқлим ўзгаришини тадқиқ этиш институти ҳисоботига кўра, дунёда ҳосил бермайдиган ерлар майдони қўрқинчли даражага етган. Ҳар йили дунёда 1 миллион километр квадрат ҳудуд унумсиз ерга айланади. Бугунги кунда бу каби ерлар майдони 15 миллион километр квадратни ташкил этади — бу Антрактида майдонидан кўпроқ, деб хабар беради The Guardian.

Институт ҳисоботида келтирилишича, ернинг деградацияга учраши иқлим ўзгариши, биологик хилма-хилликнинг йўқолиши ва глобал экологик инқирозга бевосита боғлиқ. Муаллифларнинг сўзларига кўра, олдинлари ер экотизими атмосферага чиқарилган карбонат ангидрид газининг учдан бир қисмини «ютиб юбора олган», аммо охирги ўн йилнинг ўзида ушбу қобилият 20 фоизга камайган.

Тупроқ деградациясининг асосий сабаблари — ўрмонларнинг кесилиши ва беқарор қишлоқ хўжалиги усулларидан фойдаланиш (хусусан, кимёвий ўғитлар ва пестицидлар ишлатиш — бу тупроқ эрозиясига ва сувнинг ифлосланишига олиб келади).

Ҳисобот муаллифларининг таъкидлашича, бундай усуллардан фойдаланиш қисқа муддатли истиқболда иқтисодий жиҳатдан фойдали кўринса-да, келажакда тупроқ унумдорлигига таъсир кўрсатиб, чанг бўронларини келтириб чиқаради. Бу эса ўз навбатида ҳосилдорликнинг тушиб кетишига олиб келади.

Айни вақтда Жанубий Осиё, Африка, Хитой шимоли ва Ўрта Ер денгизида ушбу муаммолар кузатилмоқда. Ҳозирда инсониятнинг учдан бир қисми қурғоқчил ҳудудларда яшаяпти.

Ҳисобот орқали Саудия Арабистонининг Ар-Риёд шаҳрида 200 та давлат вакиллари иштирокида бўлиб ўтадиган саммит олдидан барқарор ерни бошқариш бўйича глобал саъй-ҳаракатлар муҳимлигини эслатиш мақсад қилинган. «Замин» янгиликларини «Вконтакти»да кузатиб боринг