Олимлар Россия томон учаётган 70 сантиметрли астероидни аниқлади

^{Фото: Shutterstock}
4 декабрга ўтар кечаси Ёқутистонга кичик ўлчамдаги астероид тушиши кутилмоқда. Бу ҳақда Урал федерал университети (УрФУ) олимлари хабар берди.

УрФУ профессори Виктор Гроховскийнинг маълум қилишича, астероид Ер атмосферасига 3 декабр куни соат 21:17 да киради. Унинг сўзларига кўра, астероид Ёқутистондаги Олёкминск ва Ленск посёлкалари ўртасига тушиши кутилмоқда.

Европа космик агентлиги маълумотларига кўра, космик объектнинг диаметри — қарийб 70 сантиметр. «Тўқнашув хавфсиз бўлади ва катта эҳтимол билан шимолий Сибир осмонида қизил оловли шарни ҳосил қилади», — дейилади хабарда.

Telegramʼдаги Астроалерт каналининг аниқлик киритишича, C0WEPC5 номини олган астероид Ер юзасидан 100 километр баландликда атмосфера қатламига киради. Таъкидланишича, космик жисмни ерга тушиш жойидан 500 километр радиусда яхши кузатиш мумкин бўлади.

C0WEPC5 астероиди 2024 йил 3 декабр куни Аризона штатидаги Китт-Пик обсерваториясининг икки метрли телескопи ёрдамида аниқланган.

Ерга ҳар йили кичик ўлчамдаги (1 метргача бўлган) космик объектлардан бир нечтаси тушади. Олимлар одатда бундай жисмларни эрта босқичдаёқ аниқлайди. 2024 йил бошидан бери олимлар Ерга тўртта астероид тушишини прогноз қилган. 4 сентябрда Тинч океанининг жанубий қисмига 2024 RW1 астероиди тушиб, Филиппин осмонида чақнаш ҳосил қилганди — астероид атмосферада ёниб кетган. “Замин” янгиликларини “Youtube”да кузатиб боринг