Бейонсе ва Тейлор Свифт дунёнинг 100 нафар энг нуфузли аёллари рўйхатига киритилди

Forbes журнали 2024 йил натижаларига кўра дунёдаги энг нуфузли 100 нафар аёл рейтингини эълон қилди. Рейтингда Еврокомиссия президенти Урсула фон дер Ляйен кетма-кет учинчи марта биринчи ўринни эгаллади.

^{Фото: Euronews.com}
Рўйхатнинг иккинчи, учинчи ва тўртинчи ўринларини ҳам сиёсатчи аёллар, хусусан, Европа марказий банки раиси Кристин Лагард, Италия Вазирлар кенгаши раиси Жоржия Мелони ва Мексика президенти Клаудия Шейнбаум олди.

Шунингдек, кучли 10 таликка General Motors бош директори Мери Барра, Fidelity Investments раҳбари ва бош директори Эбигейл Жонсон, Accenture бош директори Жули Свит, Pivotal Ventures асосчиси Мелинда Френсис Гейтс, филантроп Маккензи Скотт ва Citi бош директори Жейн Фрэйзер кирди.

^{Фото: People}
Рўйхатда мусиқа санъати соҳасида ўз ўрнига эга бўлган Тейлор Свифт ва Бейонсе ҳам бор. Энг нуфузли аёллар рейтингидаги эстрада юлдузлари орасида Тейлор Свифт энг юқори поғона — 23-ўринни эгаллади. Хонанда Бейонсенинг шов-шувли можароларига қарамай, ушбу рейтингда у 35-ўринни эгаллади. Миллиардер бошловчи Опра Уинфри 33-ўринни эгаллаб, Бейонседан ўзиб кетишга муваффақ бўлди. Хонанда Рианна эса 76-поғонадан ўрин олди.

Forbes журнали 2004 йилдан бери ҳар йилнинг якунида дунёнинг энг нуфузли аёллари рўйхатини тузиб келади. Рейтинг таниқли журналистлар томонидан тузилади ва унда ҳар бир аёлнинг машҳурлик ва иқтисодий жиҳатдан дунёдаги ўрни баҳоланади.

Бейонсе, Тейлор Свифт, Нуфузли аёллар, Рейтинг “Замин” янгиликларини “Инстаграм”да кузатиб боринг