Украина F-16 ва ҲҲМни кузатиб борган Россия агентларини фош қилди

^{Фото: Украина Хавфсизлик хизмати}
Киев Россия ҳарбий разведкаси учун ишлаган ва Украинадаги F-16 ғарб қирувчи самолётлари ҳақида маълумот тўплаган 12 агент фош этилганини эълон қилди. Гап «Украинада F-16 самолётларини «овлаш»га ихтисослашган Россия агентларининг энг йирик тармоғи ҳақида кетмоқда», — дея маълум қилди Украина Хавфсизлик хизмати (СБУ) 17 декабр, сешанба куни.

Баёнотда таъкидланганидек, ҳужумчилар Украинанинг бешта минтақаси — Запорижжя, Харкив, Суми, Миколайив ва Одесса областларида Украина Қуролли кучларини кузатган. «Махсус операция натижасида 12 нафар агент ва уларга маълумот берувчилар фош бўлди, улардан баъзилари Украина Қуролли кучлари бўлинмаларини рухсатсиз тарк этган ва яшириниб юрган пайтда Россия махсус хизматига жалб қилинган», деди СБУ.

Украина ҲҲМ позициялари ва махфий аэродромлар ҳақида маълумот тўплаш

Улар Днипропетровск областида яшовчи шахс раҳбарлигида алоҳида ҳаракат қилиб, Украина ҳаво мудофааси позициялари ҳақида маълумот тўплаш ва F-16 самолётлари жойлашиши мумкин бўлган махфий ҳарбий аэродромлар жойлашувини ўрганиш билан шуғулланган. «Душман агентларининг алоҳида вазифаси Россия дронларига қарши радиоэлектрон уруш ускуналарини ишлаб чиқариш билан шуғулланадиган компанияларнинг манзилларини аниқлаш эди», деб таъкидлайди Украина разведка хизмати. Маълумот тўплаш учун агентлар ўзларининг танишлари, жумладан, Украина ҳарбий хизматчиларидан фойдаланган.

Ячейка аъзолари фош қилинди ва ташкилотчи қўлга олинди. Асосий шахсларга давлатга хиёнат ва Украина Қуролли кучларининг жойлашуви тўғрисидаги маълумотларни ноқонуний узатиш бўйича гумон ҳақида маълумот берилди ва тармоқнинг бошқа иштирокчиларига гумон эълон қилиш масаласи ҳал қилинмоқда. Тинтув чоғида уяли телефонлар, маълумот сақлаш воситалари, ҳарбий ҳужжатлар ва қалбаки гувоҳномалар мусодара қилинди, дея хабар беради СБУ. “Замин” янгиликларини “Facebook”да кузатиб боринг