Трамп Путин у билан учрашмоқчи эканини айтди (видео)

^{Фото: Getty Images}
АҚШнинг сайланган президенти Дональд Трамп Россия президенти Владимир Путин у билан учрашиш истагини билдиргани, бунга тайёргарлик кўрилаётганини айтди. Бу ҳақда Reuters хабар берди.

“У (Путин) учрашмоқчи. Биз тайёргарлик кўрмоқдамиз. Президент Путин учрашув ўтказишни хоҳлайди, у буни ҳатто очиқчасига ҳам айтди. Биз (урушга) якун ясашимиз керак”, деди Трамп.

У Путин ва Хитой раиси Си Цзиньпин иштирокида уч томонлама учрашув ўтказиш эҳтимолига кейинроқ аниқлик киритишини айтди.

“Трамп учрашув қачон ўтказилиши мумкинлигини ҳам аниқламаган”, дейди Reuters.

Кремль Трампнинг сўзларига ҳозирча изоҳ бермаган. Бироқ Путиннинг матбуот котиби Дмитрий Песков агар Трамп 20 январь куни инаугурациядан кейин Россия президенти билан боғланиш ниятида қолса, Москва буни фақат олқишлашини айтганди.

“Агар лавозимга киришганидан кейин олий даражадаги алоқаларни тиклаш учун сиёсий ирода сақланиб қолса, албатта, президент Путин буни фақат олқишлайди”, деган у.

Эҳтимолий учрашув

Трамп аввалроқ Путин билан музокаралар у лавозимга киришганидан кейин олти ой ичида ўтишини тахмин қилганди. Песков ҳозирча Америка томонидан бундай учрашувга сўровлар келиб тушмаганини айтган. Путиннинг ўзи декабрь ойида тўғридан-тўғри Трамп билан учрашишга тайёрлигини билдирган.

Ноябрь ойида, Трампнинг президентлик сайловларидаги ғалабасидан бир ҳафта ўтгач, Washington Post газетаси сайланган президент Путин билан телефон орқали гаплашганини ва Украинадаги урушни муҳокама қилганини ёзганди. Кремлдагилар бу маълумотни “соф уйдирма” деб атаган. “Замин” янгиликларини “Telegram”да кузатиб боринг