Америкалик астронавтлар ХКС бортидан очиқ космосга чиқди

^{Фото: NASA}
Америкалик астронавтлар 16 январ куни Халқаро космик станция (ХКС) бортидан очиқ космосга чиқди.

Қайд этилишича, астронавтлар Ник Хейг ва Сунита Уилямс астофизик ускунага хизмат кўрсатиши ва янги алоқа блокини ўрнатиши керак бўлган. Космик вакуумга чиқиш АҚШ Шарқий соҳиллари вақти билан соат 08:05 да бошланган ва техник ишлар 6,5 соатга яқин давом этган.

2024 йилнинг июнида америкалик икки астронавтнинг ХКС бортидан очиқ космосга чиқишга уриниши муваффақиятсиз якунланган эди.

ХКС бортидаги америкалик астронавтлар Трейси Дайсон ва Меттю Доминик 13 июнда космик вакуумга чиқиши керак бўлган, аммо скафандр билан боғлиқ муаммолар туфайли жараён бекор қилинган эди. 24 июнда астронавтлар очиқ космосга 31 дақиқага чиққан ва Дайсон скафандридаги совутиш контуридан сув оққани сабаб станцияга қайтишга мажбур бўлганди.

Айни вақтда ХКСда етти кишидан иборат экипаж — «Роскосмос» космонавтлари Алексей Овчинин, Иван Вагнер ва Александр Горбунов, NASA астронавтлари Ник Хейг, Доналд Петтит, Бутч Уилмор ва Сунита Уилямс фаолият юритмоқда.

23 январ куни америкалик астронавтлар жорий йилнинг ўзида иккинчи бор очиқ космосга чиқишни режалаштирган. «Замин»ни Telegram’да ўқинг!