Германияда эркак соатига 280 км тезликда ҳаракатланган поездга осилиб олди

^{Фото: Getty Images}
Германияда чиптасиз эркак соатига 280 километрдан юқори тезликда ҳаракатланган поездга осилиб олиб, қарийб 30 километр масофани босиб ўтди, деб хабар беради BBC.

Қайд этилишича, Венгрия фуқароси бўлган 40 ёшли эркак Мюнхендан Германия шимолида жойлашган Любекка кетаётган поездга чиптасиз чиқиб олган. Поезд Мюнхендан 70 километр шимолда жойлашган Инголштадт станциясида тўхтаган вақтда, йўловчи тамаки чекиш учун платформага чиққан. Шу вақт поезд эшиклари ёпилиб, ҳаракатланишни бошлаган ва эркак вагонлар орасидаги очиқ жойга кириб, торсга осилиб олган.

Полиция маълумотига кўра, поезд соатига 282 километр тезликда ҳаракатини давом эттирган. Орадан кўп ўтмай машинист Инголштатддан 30 километр узоқликда поездни тўхтатган ва чиптасиз йўловчи қўлга олинган.

Полиция томонидан сўроқ қилинган вақтда йўловчи чамадони ва барча ҳужжатлари поезд ичида қолгани учун унга осилиб олишга мажбур бўлганини билдирган. Хавфли саёҳатга қарамай, эркакка ҳеч қандай жароҳат етмаган. У чиптасиз ҳаракатлангани ва жамоат тартибини бузгани учун жиноий жавобгарликка тортилиши мумкин. «Замин»ни Telegram’да ўқинг!