Россия Зеленский билан тўғридан тўғри музокаралар ўтказишга тайёрлигини маълум қилди

Владимир Путин Украина президентини «нолегитим» дея ҳисобласа ҳам Россия Володимир Зеленский билан музокаралар ўтказишдан бош тортмайди. Бу ҳақда Кремл матбуот котиби Дмитрий Песков маълум қилди.

«Жаноб Зеленский ўзининг легитимлиги нуқтайи назаридан де-юре катта муаммоларга эга, аммо ҳатто шунга қарамай, Россия томони музокаралар учун очиқ», — дейди Песков.

Шу билан бирга, унинг таъкидлашича, Украина раҳбарияти бундан «манфаатдорлигини намоён этиши» ва Путин билан алоқага қўйилган қонунчилик тақиқини бекор қилиши керак. Акс ҳолда Кремл Зеленскийнинг Россия президенти билан тўғридан тўғри музокараларга тайёр экани ҳақидаги баёнотини жиддий қабул қилмайди.

«Тайёрлик нимагадир асосланиши керак… Шунинг учун ҳозирча буни қуруқ гапдан бошқа нарса сифатида қабул қилиб бўлмайди», — дейди Песков.

Украина президенти 4 феврал куни урушни тугатиш учун Путин билан тўғридан тўғри музокаралар ўтказишга тайёрлигини маълум қилди. «Агар бу украинлар учун тинчликка эришиш ва одамларни йўқотмаслик йўлида ягона конфигурация бўлса, албатта, биз бунга борамиз», — деган Зеленский. Шу билан бирга, у Путинга нисбатан «меҳрибон» бўлмаслиги, чунки уни «душман» дея ҳисоблашини таъкидлаган. Зеленскийнинг қўшимча қилишича, музокаралар столида Украина ва Россиядан ташқари АҚШ ва ЕИ ҳам бўлиши керак.

Зеленский, шунингдек, британиялик журналист Пирс Морганга берган интервюсида агар Украина НАТОга қабул қилинмаса, ядровий қурол етарлича хавфсизлик кафолати бўлиши мумкинлигини маълум қилган. Зеленскийнинг қайд этишича, агар Украина НАТО аъзоси бўлмаса, «Путин мамлакат ҳудудидан бутунлай чиқиб кетиши керак», шундан сўнг Киев барча йўқотишлар учун молиявий компенсация масаласини кўтаради. “Замин” янгиликларини “Telegram”да кузатиб боринг