Россиялик ҳарбийлар фронтда эшаклардан фойдалана бошлади (видео)

^{Россия армияси техникалар билан боғлиқ дефицитга юзлашмоқда
Фото: Рус манбалари}
Кенг кўламли уруш ўзининг тўртинчи йилига яқинлашар экан, Россия армиясида зирҳли техникалар тақчиллиги ортиб бормоқда. Буни тармоқларда муҳокамаларни келтириб чиқарган тасвирлар тасдиқлайди. Уларда ўқ-дориларни ташиш учун фронтдаги аскарларга эшаклар берилгани акс этган.

^{Россиялик аскар эшакларга ем бермоқда
Фото: Рус манбалари}
Урушни ёритиб борувчи манбаларга кўра, жониворлар анъанавий транспорт воситалари ўрнини босиш учун ишлатилмоқда. Эшаклар ўқ-дорилар ва бошқаларни ташиш, ҳатто қўшинлар ҳаракатланиши учун хизмат қилиши мумкин. Рус аскарларидан бири мазкур ҳолатга ўз муносабатини қуйидагича изоҳлаган:

“Буни қабул қилиш керак. Қаердан, нима учун ва қандай қилиб — билмайман. Лекин факт шуки, бизга эшак беришди”.

Шунингдек, у жонивор логистика мақсадлари учун берилганини қўшимча қилган:

“Бу эшак таъминот бўлинмаси билан бирга жойлашган. Транспорт воситалари билан боғлиқ муаммоларимиз бор, юк машиналаримиз йўқ қилинмоқда. Шундай қилиб, энди бизда ўқ-дори ташувчи тирик эшак бор. Бу кўнгиллиларнинг хайрия ёрдами эмас — бизнинг юк машинамиз таъминот олиб келишга чиқиб, эшаклар билан қайтди”.

Бироқ баъзи рус ҳарбий блогерлари эшаклар маҳаллий ташаббус бўлганини даъво қилди. Аммо бу ҳақда биринчиларда бўлиб ёзган Крилл Федеров мудофаа вазирлиги қарорига таяниб, ташаббус юқори қўмондонликка тегишли эканини айтди.

“Жангчиларга ўқ-дориларни етказиш учун эшак берилди. Нима кутган эдингиз? Айни кунларда техникалар етишмайди”, деб ёзади у ўз Telegram каналида.

Аввалроқ Украинада жанг қилаётган рус аскарлари зирҳли техникаларнинг катта йўқотишлари туфайли отларга ўта бошлагани ҳақида хабар берилганди.

Журналистлар таъкидлашича, Украинада Россия техникасининг йўқотишлари 15 мингтадан ошган. Янги техника ишлаб чиқариш эса кечикмоқда. Совуқ уруш давридаги эски техника захиралари 2024 йил охирида тугаб қолган. Бу эса Россиянинг айрим ҳарбийларини охир-оқибат отларга ўтишга мажбур қилган.

Россиянинг Украинадаги йўқотишлари

Қуролли можаролар иштирокчиларининг йўқотишларини визуал далиллар асосида тасдиқлаб борадиган ОРЙХ порталига кўра, Россия томони кенг кўламли уруш бошидан буён 3734 та танк ҳамда 5443 та пиёда жанговар машинасидан айрилган. “Замин” янгиликларини “Telegram”да кузатиб боринг