07:10 / 07.02.2025

Илон Маск Украина ҳақида сохта хабар тарқатди (видео)

Америкалик тадбиркор Илон Маск X ижтимоий тармоғида жаҳон юлдузларининг Украинага сафари молиялаштирилгани ҳақидаги сохта хабарни тарқатди. Бу Россиянинг "Матрёшка" дезинформация тармоғига боғлиқ бўлиши мумкин, деб ёзади The Insider.

Маск жойлаган видеода АҚШ Халқаро тараққиёт агентлиги (USAID) президент Зеленскийни қўллаб-қувватлаш мақсадида таниқли шахсларнинг Украинага ташрифларини ташкил қилиш учун америкалик солиқ тўловчиларнинг пуллари сарфлангани айтилган.

Гўё ENews медиа компанияси томонидан эълон қилинган сохта видеода қатор машҳур актёрлар Украинага боргани учун катта маблағ олгани даъво қилинган:

Анжелина Жоли – 20 миллион доллар;
Орландо Блум – 8 миллион доллар;
Бен Стиллер – 4 миллион доллар;
Жан-Клод Ван Дамм – 1,5 миллион доллар.

Бен Стиллер ушбу дезинформацияга тезкор жавоб қайтариб, Украинага сафари ўз ҳисобидан молиялаштирилганини ва USAID ташкилотидан ҳеч қандай ёрдам олмаганини айтди. Украина Дезинформацияга қарши кураш маркази раҳбари Андрей Коваленко ҳам ENews бундай материални чоп этмаганини таъкидлади.

Раддияларга қарамай, Маск бу ёлғон контентни узоқ вақт давомида X саҳифасидан ўчирмади. Шу вақт ичида пост остида ижтимоий тармоқ томонидан изоҳ пайдо бўлди, унда материал ENews услубига тақлид қилиб яратилгани, бироқ медиа компания бундай янгиликни эълон қилгани ҳақида ҳеч қандай далил йўқлиги айтилган.

2024 йил декабрь ойида Bluesky ижтимоий тармоғида Россиянинг "Матрёшка" дезинформация кампанияси пайдо бўлгани аниқланди. Уни биринчи бўлиб Bellingcat асосчиси Элиот Хиггинс пайқади. Кампания таркибида олтита сохта видео бўлиб, улар бир хил тамойил асосида ишланган: аввал ишончли шахс (мутахассис, профессор ёки нуфузли университет талабаси) ўзини таништиради ва экологик мавзу ҳақида гапиради. Кейин эса, ушбу шахснинг иштирокисиз, унинг овози Украинага қарши ривоятларни тарқатишда ишлатилади, Ғарбни Россия билан алоқаларни яхшилашга чақириш ва Зеленскийни обрўсизлантиришга уринишлар қилинган.