Трамп Зеленский билан қачон учрашиши мумкинлигини айтди

АҚШ президенти Дональд Трамп келгуси ҳафта Украина президенти Владимир Зеленский билан учрашиб, уруш ҳақида суҳбатлашиши мумкинлигини маълум қилди.

Трамп бу учрашув шахсан бўладими ёки видеоконференция тарзида ўтказилишига аниқлик киритмади. У Япония бош вазири Сигеру Исибани Оқ уйнинг Овал кабинетида қабул қилиш пайтида журналистларнинг саволларига жавоб берар экан, мазкур эҳтимол ҳақида гапирди, деб ёзмоқда Дарё нашри.

Трамп “эҳтимол, келгуси ҳафта президент Зеленский билан учрашишини” айтди.

АҚШ етакчиси, шунингдек, россиялик ҳамкасби билан учрашишга яна қизиқиш билдириб, Путин билан доимо “яхши муносабатлар”да бўлганини таъкидлади.

Зеленский билан учрашув жойи ҳақидаги саволга жавоб берар экан, Трамп ўзи “шу ерда — Вашингтонда” эканлигини айтиб, Киевга бориш нияти йўқлигини қўшимча қилди.

"Мен бу уруш шунчаки инсонийлик нуқтаи назаридан тугашини истардим. Бу бемаъни уруш", деди Трамп.

У Зеленский билан Украина бойликларини, хусусан, ноёб ер минераллари хавфсизлигини таъминлаш ҳақида гаплашмоқчи эканлигини ва АҚШнинг қўллаб-қувватлаши эвазига “тенг миқдорда нимадир” олишни истаётганини айтди.

"Биз улар ҳам ўз навбатида шундай жавоб беришларини хоҳлаймиз", деди Оқ уй раҳбари.

Зеленский Трампнинг баёнотига жавобан Вашингтон ва Киев музокаралар ўтказишни режалаштирганини маълум қилди.

"Биз ҳар доим президент Трамп билан ҳамкорликни қадрлаймиз. Жамоалар даражасида учрашувлар ва музокаралар ўтказишни ҳам режалаштирганмиз. Украина ва АҚШ жамоалари аллақачон тафсилотларни ишлаб чиқмоқда", деб ёзди Зеленский Х платформасидаги постида.

Зеленский маъмурияти раҳбари Андрей Ермакнинг айтишича, Киев шу ойда Трампнинг Украинадаги махсус вакили Кит Келлогнинг ташрифини кутилмоқда. Ермак Келлог билан жанг майдонидаги вазият, Украина тинч аҳолиси хавфсизлиги ва шу ой охирида бўлиб ўтадиган йиллик Мюнхен хавфсизлик конференциясидаги учрашувлар каби мавзуларни муҳокама қилганини таъкидлади.

Трамп аввал ҳам Украинанинг нодир ер элементларини Америка ёрдами эвазига олишга қизиқиш билдирган эди.

"Биз Украина билан шундай битим тузмоқчимизки, унга кўра, улар биздан олаётган нарсалар эвазига бизга нодир ер элементлари ва бошқа маҳсулотларни беришади", деди Трамп.

У нодир ер элементлари етказиб берилишининг хавфсизлигини таъминлашни истаётганини ва Украина бу борада ёрдам беришга тайёр эканлигини қўшимча қилди.

"Биз юзлаб миллиард доллар сармоя киритмоқдамиз. Уларда ажойиб нодир ер элементлари мавжуд", деб таъкидлади АҚШ президенти.

Украинанинг АҚШ билан ноёб минералларни биргаликда қазиб олиш бўйича таклифи мамлакат президенти Владимир Зеленский 2024 йил октябрда — Америкадаги президентлик сайловидан олдин, Трамп ва республикачи конгрессменларга тақдим этган “ғалаба режаси”нинг бандларидан бири ҳисобланади. Бу ҳақда Financial Times (ФТ) нашри ёзган, кейинроқ эса Украина президенти офиси маслаҳатчиси Михаил Подоляк ушбу маълумотни тасдиқлаган ва гап, хусусан, литий ва титан конлари ҳақида кетаётганига аниқлик киритган. “Замин” янгиликларини “Telegram”да кузатиб боринг