15:57 / 14.02.2025

Х Трампнинг аккаунти блоклангани учун 10 млн доллар тўлайди

^{Фото: NDTV}
Илон Маскнинг Х ижтимоий тармоғи АҚШ президенти Дональд Трампга 2021 йил 6 январда унинг тарафдорлари Капитолийга бостириб кирганидан кейин сиёсатчининг ижтимоий тармоқлардаги аккаунтлари блокланганидан кейин берган даъвосини ҳал қилиш учун 10 миллион доллар тўлайди. Бу ҳақда Reuters'га таяниб Дарё хабар берди.

Меta Трампга 25 миллион доллар тўлади

Х Трампнинг аккаунтлари блокланганидан кейин у билан келишувга эришган иккинчи платформа бўлди. Ўтган ойда Марк Цукербергнинг Меta Платформс компанияси худди шундай битим доирасида АҚШ президентига 25 млн доллар тўлашга рози бўлганди. Ўшанда Трампнинг адвокати Жон Коул бундай келишув президент ва Цукерберг ўртасидаги музокаралар натижасида эришилганини айтган.

Келишув доирасида Меtа Трампнинг президентлик кутубхонаси қурилиши учун 22 миллион доллар ўтказади, қолган 3 миллионни АҚШ президенти билан бирга даъво аризаси берган даъвогарлар олади.

Трампнинг ижтимоий тармоқларга қарши даъволари

2021 йилда сиёсатчи бошқа бир қанча даъвогарлар билан биргаликда Facebook, Twitter (ҳозирги Х) ва Alphabet (Google ва унинг шўба корхоналарини бошқарадиган холдинг компанияси) ижтимоий тармоқлардаги аккаунтлари блоклангани учун судга мурожаат қилганди.

Трампнинг Facebook, Instagram, YouTube (Google’га тегишли) ва Twitter’даги аккаунтлари 2021 йил январида унинг тарафдорлари президентлик сайловлари натижаларидан норози бўлиб, Капитолий биносига бостириб кирганидан кейин блокланган. Унинг Facebook саҳифаси эас 2023 йилда блокдан чиқарилган ва Х аккаунти 2022 йилда қайта тикланганди.