Собиқ президент Порошенко давлатга хиёнатда гумонланмоқда

Петро Порошенко деган одамни эсласангиз керак. 2014 йил украинлар Виктор Януковични ағдаргач, президентлик сайлови ўтказилган ва унда айнан мана шу тадбиркор ғолиб бўлганди.

Порошенконинг сайловдаги ғалабаси ёрқин бўлади, лекин унинг президентлиги ҳақида бундай деёлмаймиз. Ахир тадбиркорликдан чиққан, сиёсатда суяги қотмаган Порошенко Қримдай катта ҳудудини бой берган, Донбассда уруш ҳолатига тушиб қолган чалажон Украинани бошқариши керак эди.

Порошенко президентлиги украинлар учун оғир кечади, унинг фаолиятига саволлар жуда кўп бўлди. Масалан, дунёдаги энг катта давлатга қарши урушаётган Украина негадир армияни деярли ривожлантирмайди, ёппасига қурол-яроғ сотиб олмайди. Етмаганига Порошенконинг Россиядаги заводлари Донбассда уруш давом этаётган вақтда ҳам ишлайверади. Дарвоқе, билмаганлар учун: Порошенко дунёга машҳур Roshen конфет заводи асосчиси ҳисобланади. Эътибор берсангиз, Roshen сўзи ҳам Порошенко сўзидан ажратиб олинган.

Хуллас, Порошенконинг президентлигига саволлар жуда кўп бўлгани учун 2019 йил ўтказилган сайловларда актёр Зеленский конфетчи Порошенкони осонлик билан мағлуб этади. Ўша сайловларда амалдаги президент Порошенкодан ташқари машҳур сиёсатчилар Юлия Тимошенко ва Юрий Бойко ҳам қатнашганига қарамай, сиёсий дебютант Зеленский иккинчи турда 74 фоиз овоз олиб ғолиб бўлади.

Зеленский ғолиб бўлишига ўша вақтда мамлакат телеканалида эфирга узатилаётган «Слуга народа» сериали асосий рол ўйнайди. Филм Зеленский рейтингини кескин кўтариб юборганди. Бундан ташқари Киевдаги «Олимпийский» стадионида минглаб украинлар кўз ўнгида ўтган дебатда Зеленский Порошенкони «еб ташлаганди».

Энди давлатга хиёнатда айбланиши мумкин

Ана шу Порошенкога нисбатан бугун Украина миллий хавфсизлик ва мудофаа кенгаши томонидан санкция эълон қилинди. Порошенкодан ташқари Константин Жеваго ва «Приватбанк» собиқ хўжайини Геннадий Боголюбов ҳам кенгаш «қора рўйхати»га тушган. Зеленский 13 феврал куни бу қарорни тасдиқлади.

Шунингдек, Путиннинг Украинадаги одами, уруш бошида «Азов» баталёни командирларига алмашилган Виктор Медведчук ва Украинанинг энг бой одамларидан бўлмиш Виктор Коломойский ҳам санкцияга учраган. Медведчук ҳозир Россияда, Коломойский эса Украина Хавфсизлик хизмати томонидан 2023 йилда ҳибсга олинган.

Рўйхатдаги Виктор Медведчук ва Петро Порошенко давлатга хиёнатда гумонланмоқда. Медведчук-ку тушунарли, у Украинада Россия манфаатлари учун хизмат қилганини ҳамма билади. Бундай бўлмаса, Москва Украина фуқароси бўлган Медведчукни Россия фашистлар деб эълон қилган баталён лидерларига алмашмаган бўларди. Порошенкони эса ўша эски иш – Донбассдаги Россия таъсиридаги гуруҳлардан кўмир сотиб олишда айбланмоқда. Бу иш Зеленский президент бўлганидан кўп ўтмай қўзғатилганди.

Санкцияга тушганларнинг Украинада олинган мукофотлари бекор қилинади, автивлари блокланади, улар савдо операциялари амалга ошира олмайди, Украинадан чиқолмайди ва мамлакат ичида яшаш манзилини ўзгартира олмайди.

Порошенко ўзига нисбатан айбловларни сиёсий деб атади ва барчасининг буюртмачиси президент Зеленский эканини айтди.

Путин нима деганди?

Порошенкога нисбатан санкция қўллангач, тармоқда Россия президенти Владимир Путин унга сиёсий бошпана беришга тайёрлигини айтган видео тарқалди. Бу фейк эмас, лекин шу кунларда айтилган гап ҳам эмас. Путин бу гапни 2022 йил 7 феврал куни, яъни Россия Украинага бостириб киришидан икки ҳафта аввал айтган.

Эсингизда бўлса, Путин Кремлда Макронни қабул қилган ва улар ўша машҳур узун столнинг икки томонидан туриб 6 соат суҳбатлашганди. Ўша учрашув якунлари бўйича ўтказилган матбуот анжуманида Путин шундай деган: «Ҳозир Порошенкони давлатга хиёнатда айблашмоқчи. Ахир мен ҳали навбат келади деганда ҳазиллашмагандим. Бундай ҳолатда биз Порошенкога сиёсий бошпана беришга тайёрмиз. Лекин унинг сиёсати бизга ёққани учун эмас, одамийлик қилиб», деганди Путин. Порошенко Россия президентига Украина ўз муаммоларини мустақил ҳал қилишини айтиб жавоб берганди.

“Замин” янгиликларини “Telegram”да кузатиб боринг