09:02 / 15.02.2025

Зеленский фойдали қазилмалар бўйича АҚШ билан келишувни имзолашдан бош тортди

^{Фото: AFP}
Володимир Зеленский Мюнхенда АҚШ билан Украинадаги барча фойдали қазилмалар захирасининг ярмини Қўшма Штатларга беришни назарда тутувчи келишувни имзолашдан бош тортди. Бу ҳақда The Washington Post журналисти Жош Рогин хавфсизлик бўйича Мюнхен конференциясида иштирок этган америкалик конгрессменларга таяниб хабар берди.

«Мюнхендаги бир нечта конгрессменнинг айтишича, АҚШ делегацияси Зеленскийга у имзолашини исташган қоғозни топширишган. Ушбу ҳужжат орқали АҚШ Украинанинг келажакдаги барча фойдали қазилмалар захирасини 50 фоизига эгалик қилиши кўзда тутилган. Зеленский хушмуомалалик билан унга имзо чекишдан бош тортди», — дейди Рогин.

Reuters агентлиги манбаларининг маълум қилишича, Зеленский Мюнхенда америкалик сенаторлар гуруҳи билан учрашув давомида АҚШ тайёрлаган келишувдан хавотирда эканини билдирган. «[Зеленский] ундан танишиб чиқишга имконияти бўлмаган ҳужжатни асоссиз имзолашни талаб қилишаётганини ҳис қилди», — дея таъкидлайди агентлик суҳбатдошларидан бири.

Манбага кўра, Зеленский Украина мамлакат конституциясига асосланган ўз таклифини тайёрлашини айтган. Қайд этилишича, Киев вакиллари 14 феврал куни фойдали қазилмалар бўйича икки томонлама келишувга оид ўз таклифларини АҚШга топширган.

Украина президенти Володимир Зеленский 14 феврал куни Мюнхенда АҚШ вице-президенти Жей Ди Вэнс билан учрашув ўтказди. Унда, шунингдек, давлат котиби Марко Рубио ва Трампнинг махсус вакили Кит Келлог ҳам иштирок этган. «Жамоаларимиз ҳужжат устида ишлашни давом эттиради», — деди Зеленский музокаралардан кейин.

Доналд Трамп бир неча бор Киевга кўрсатилган Америка ёрдами эвазига Украинанинг 500 миллиард долларлик ноёб металларини қўлга киритишни исташини айтган. Афтидан, гап титат, уран ва литий ҳақида кетмоқда. Трампнинг таъкидлашича, АҚШ Россия ва Украина ўртасида тинчлик келишуви муваффақиятли тузилишидан қатъи назар, Украина табиий ресурсларидан фойдаланиш имкониятига эга бўлиши керак. Зеленский Украина кўрсатилаётган ёрдам эвазига ғарбдаги шериклари билан фойдали қазилмаларни биргаликликда олишга очиқ эканини маълум қилган.