Трамп-Путин музокаралари қачонга режалаштирилмоқда?

АҚШ ва Россиянинг юқори лавозимли расмийлари келаси ҳафта Саудия Арабистонида Доналд Трамп ва Владимир Путин ўртасидаги эҳтимолий учрашувни муҳокама қилиш учун йиғилади. Bloomberg манбаларига кўра, икки давлат раҳбарлари ўртасидаги музокаралар февраль ойи охирида бўлиб ўтиши режалаштирилган.

Учрашув тафсилотлари ҳозирча ишлаб чиқилмоқда, унда АҚШ миллий хавфсизлик бўйича маслаҳатчиси Майк Уолц ва АҚШ президентининг Яқин Шарқ бўйича махсус вакили Стив Уиткофф иштирок этиши кутилмоқда.

Саудия Арабистонидаги учрашувдан мақсад мусулмонлар учун муқаддас Рамазон ойи бошланишидан олдин, яъни 2025 йил 1 мартгача ўтказилиши режалаштирилган Трамп ва Путин музокаралари санасини белгилашдан иборат.

Агентлик манбаларига кўра, икки давлат раҳбарларининг учрашувида Украина вакиллари ҳам иштирок этиши кутилмоқда. Аммо европалик сиёсатчиларнинг кўпчилиги ҳозирча учрашувга тайёргарлик ҳақида хабардор қилинмаган.

12 февраль куни Доналд Трамп Владимир Путин ва Владимир Зеленскийга қўнғироқ қилди. Шундан сўнг, у урушни тугатиш бўйича музокараларни бошлашга рози бўлганини маълум қилди.

Владимир Зеленский бир неча бор Украина иштирокисиз Украина бўйича музокаралар олиб борилмаслигини айтган.

Трампнинг Украина ва Россия бўйича махсус вакили Кит Келлогг 15 февраль куни Европани Украина бўйича тинчлик музокараси столида кўрмаслигини айтди. “Замин” янгиликларини “Telegram”да кузатиб боринг