22:07 / 19.02.2025

АҚШ Украина фуқароларидан миграция аризаларини қабул қилишни тўхтатди

^{Фото: Depositphotos}
АҚШ президенти Дональд Трамп маъмурияти собиқ президент Жо Байден даврида Қўшма Штатларга киришга рухсат берилган Лотин Америкаси ва Украинадан келган муҳожирларнинг барча иммиграция аризаларини кўриб чиқишни тўхтатди. Бу ҳақда CBS News'га таяниб Дарё хабар берди.

АҚШ ҳукуматининг қарори мамлакатда қонуний асосда қолиш имконини берувчи турли иммиграция имтиёзларини олиш учун ариза топшириш жараёнида бўлган муҳожирларга таъсир қилади.

"Аризаларни кўриб чиқиш номаълум муддатга тўхтатилди, ушбу даврда амалдорлар фирибгарлик бўйича аризаларни текшириш, шунингдек, текшириш тартиб-қоидаларини такомиллаштириш билан шуғулланади", дейилади хабарда.

Тақиқ Байден маъмуриятининг хорижликларга гуманитар сабабларга кўра АҚШда вақтинча қолишга рухсат берган бир нечта дастурларини қамраб олади. Ушбу дастурлар орасида “Украина учун бирлашиш” (Uniting for Ukraine) бўлиб, унга кўра украиналиклар молиявий ҳомийлар мавжуд бўлган тақдирда вақтинчалик мақом билан АҚШга киришлари мумкин эди.

CHNV номи билан танилган яна бир дастур Қўшма Штатларда ҳомийларга эга бўлган Венесуэла, Гаити, Никарагуа ва Кубадан келганларга тегишли. Учинчи дастур АҚШда қариндошлари бўлган Марказий Америка, Колумбия, Эквадор, Гаити ва Кубадан келган шахслар учун мўлжалланган.

Трамп маъмурияти январь ойида хорижликларга АҚШда вақтинча яшаш имконини берувчи дастурлар, жумладан, “Украина учун бирлашиш” дастури доирасида янги муҳожирларнинг киришини тўхтатди. Шу билан бирга, хорижликларнинг бир қисми аллақачон АҚШда бўлиб, мамлакатда доимий яшаш учун рухсат олишни кутаётган эди.

"Юқорида тилга олинган учта дастур доирасида АҚШга келган хорижликларнинг кўпчилиги фақат вақтинчалик ишлаш учун рухсатнома ва депортациядан икки йиллик ҳимояга эга бўлганлиги сабабли, уларнинг баъзилари бошқа иммиграция имтиёзларини олиш учун мурожаат қилишган", дейди ҳуқуқшунослар.

Бироқ АҚШ ҳукумати Фуқаролик ва иммиграция хизмати ходимлари Байден даврида киришга рухсат берилган муҳожирлар томонидан берилган бўлса, ушбу дастурлар учун ҳам, бошқа ҳар қандай имтиёзлар учун ҳам аризаларни қайта кўриб чиқмасликка қарор қилди.

CBS News маълумотларига кўра, “Украина учун бирлашиш” дастури доирасида Трамп президентлик лавозимига киришишидан олдин АҚШга мамлакат фуқаролари ҳомийлигида 240 мингга яқин украиналик келган. ЧНВ дастури орқали Куба, Гаити, Никарагуа ва Венесуэладан Қўшма Штатларга 530 минг киши кириб келган.