Трампнинг махсус вакили Киевда илк учрашувларини ўтказди

^{Фото: Украина президенти офиси}
Киевга ташриф билан келган АҚШнинг Украина ва Россия бўйича махсус вакили Кит Келлог Украина Қуролли кучлари бош қўмондони Александр Сирский билан учрашди. Бу ҳақда 19 феврал, чоршанба куни кечқурун Украина президенти Володимир Зеленский ўзининг видеомурожаатида маълум қилди. Унга кўра, Келлог разведка идоралари, махсус хизматлар раҳбарлари, шунингдек, Украина президенти девони раҳбари Андрей Ермак билан музокаралар ўтказган.

«Кит Келлог фронтда содир бўлаётган воқеалар, шу йиллар давомида ўзгармаган миллатимизнинг мустаҳкамлиги ва руҳи ҳақида тўлиқ маълумот олиши биз учун муҳим... Ҳарбий қўмондонлик ва жойлардаги қўмондонларнинг жанг майдонидаги вазият ҳақида брифинглари муҳим бўлади», — деб ёзди Ермак ўзининг Telegram-каналида.

Зеленскийнинг ўзи Кит Келлогни 20 феврал куни қабул қилмоқчи. «Умуман олганда, Америка билан учрашув ва ҳамкорлик конструктив бўлиши биз учун жуда муҳим. Америка ва Европа билан биргаликда тинчлик янада ишончли бўлиши мумкин ва бу бизнинг мақсадимиз», — дея таъкидлади Украина раҳбари.

Кит Келлог Киевга 19 феврал куни эрталаб етиб келди. "Суспільне" телеканали журналистларига берган изоҳида у ўзининг ташрифи «яхши потенциал музокаралар ўтказиш учун имконият» эканлигини айтди. Келлог Доналд Трампнинг кўп марта айтган сўзларини такрорлади: «Агар Трамп президент бўлганида уруш бошланмасди». Келлогнинг ташрифи 21 февралгача давом этиши кутилмоқда.

Ермак MSC'да Келлогга: Путин сизни алдашига йўл қўйманг

Андрей Ермак 14 феврал куни Мюнхен хавфсизлик конференциясида Трампнинг махсус вакили билан учрашган эди. Уларнинг суҳбатининг асосий мавзуси, Украина президенти девони раҳбарининг сўзларига кўра, «барқарор тинчликка эришиш бўйича ишларни мувофиқлаштириш» бўлди. Суҳбат чоғида Ермак Келлогга Путин «ҳеч қачон қоидалар билан ўйнамаслигини» айтди ва уни «ўзини алдаб қўймасликка» чақирди. «Руслар фақат кучни ҳурмат қилади, ундан фойдаланмайдиганларни эса менсимайди. Россия ваъда қилганда эмас, мажбур бўлганда тўхтайди», — дейди Андрей Ермак. “Замин” янгиликларини “Telegram”да кузатиб боринг