Фото: AP
“Титаник” кемасининг чекиш хонасидан олинган тўққиз килограммлик олтин қандил Ню-Жерси штатидаги музейда намойишга қўйилди. Бу ҳақда New York Post хабар бермоқда.
Қандил Атлантика океани тубида 75 йил ётгандан сўнг 1987 йилда қуруқликка чиқарилган. Мутахассисларнинг таъкидлашича, биринчи классдаги эркаклар чекиш хонасини безаган бу буюм яхши сақланиб қолган. Қандил кемадан олинган бошқа 250 га яқин ноёб буюмлар билан бирга кўргазмада намойиш этилмоқда.
Кўргазма шундай ташкил этилганки, ташриф буюрувчилар ўзларини “Титаник” йўловчилари ролида ҳис қилиши ва лайнернинг қурилишидан ҳалокатга қадар босиб ўтган йўлини кузатиши мумкин. Музейда ҳатто қайта тикланган хоналарни кўздан кечириш ва сунъий айсбергни ушлаб кўриш, фожиа кунидаги каби совуқни ҳис қилиш имконияти мавжуд.
Кўчма экспозиция аввал Бостонда намойиш этилганди. Бутун дунё бўйлаб уни тахминан 35 миллион киши томоша қилган. Ню-Жерси штатида уни 1 сентябргача Жерси-Сити шаҳридаги Liberty илм-фан марказида томоша қилиш мумкин.
Аввал “Титаник”нинг 700 дан ортиқ йўловчисини қутқарган Британия пароходи капитанига совға қилинган тилла соат аукцион орқали 1,56 миллион фунт стерлингга сотилганди. Соатни америкалик хусусий коллекционер харид қилган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
