Фото: Google Images
Криптовалюта олами яна бир катта ҳакерлик ҳужумига гувоҳ бўлди. Дунёдаги энг йирик криптобиржалардан бири Bybit хакерлар томонидан бузиб кирилди ва жами 1,46 миллиард доллар маблағ ўғирланди. Бу ҳақда Bloomberg агентлиги хабар тарқатди.
Ҳужум қандай амалга оширилди?
Bybit жамоасининг маълум қилишича, ҳакерлар Ethereum'га тегишли “совуқ ҳамён”лардан бирига ноқонуний равишда кириш ҳуқуқини қўлга киритишган. Улар сохта фойдаланувчи интерфейси ва смарт-шартномалардаги ўзгаришлар ёрдамида транзакциялар учун имзо олишга муваффақ бўлган. Бу эса маблағларни ўз манзилларига ўтказишга имкон берган.
Компаниянинг расмий муносабати
Bybit вакиллари ушбу ҳужумни тасдиқлаб, биржа қолган “совуқ ҳамён”ларининг хавфсизлигини кафолатлашди. Уларга кўра, мижозларнинг маблағлари ҳимояланган ва биржанинг фаолияти муаммосиз давом этмоқда. Расмий баёнотда шундай дейилган:
“Биз ўз фойдаланувчиларимиз ва ҳамкорларимизни Bybit'даги қолган активлар мутлақо хавфсиз эканлигига ишонтирмоқчимиз. Бизнинг операцияларимиз одатдагидек узилишларсиз давом этмоқда.”
Ҳужумни ким амалга оширган?
Тахминларга кўра, ушбу ҳужум Шимолий Кореянинг машҳур Lazarus хакерлик гуруҳи томонидан амалга оширилган. Бу гуруҳ аввал ҳам бир неча бор криптовалюта биржалари ва молиявий платформаларга ҳужум қилгани билан танилган.
Bybit криптобиржасида содир бўлган хакерлик ҳужуми бугунги рақамли молия тизимида хавфсизликнинг нақадар муҳим эканлигини яна бир бор исботлади. Криптоинвесторлар учун хавфсизлик чораларини кучайтириш ва активларини ҳимоя қилиш жуда муҳим. Мухлислар эса ушбу ҳодисанинг Bybit'га ва бутун криптовалюта бозорига қандай таъсир кўрсатишини кузатишда давом этмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
