15:40 / 24.02.2025

АҚШ ва Украина тез орада ресурслар бўйича келишувни имзолашга тайёрланмоқда

^{Стив Уиткофф Фото: AP / Evan Vucci}
АҚШга Украинанинг минерал ресурсларига, жумладан, нодир металларига кириш ҳуқуқини берувчи битим шу ҳафта ичида имзоланади. Бу тахминни 23 феврал, якшанба куни CNN телеканалида АҚШ президенти Доналд Трампнинг Яқин Шарқ бўйича махсус вакили Стив Уиткофф билдирди.

The New York Times газетасининг ёзишича, Трамп ва Уиткофф ўртасида шахсий, ишончли муносабатлар мавжуд. Нашр эслатишича, бир неча ҳафта олдин Трамп Уиткоффнинг ваколатини Яқин Шарқ тинчлик жараёни доирасидан ташқарига яширинча кенгайтирди ва истеъфодаги генерал Кит Келлог унинг Украина ва Россия бўйича махсус вакили этиб тайинланганига қарамай, унга Россия раҳбарияти билан Украина бўйича музокаралар каналини очишни топширди.

Украина президенти Володимир Зеленский 23 феврал куни CNN телеканалига берган интервюсида Украина раҳбарининг Вашингтон билан келишувни дастлаб ишлаб чиқилганидек қабул қилишдан бош тортганига ишора қилиб, «бир ҳафта олдин бу борадаги қарор бўйича иккиланиб юрганини» билдирди. «АҚШ президенти Доналд Трамп унга хабар юборди. У энди иккиланмайди», — дея қўшимча қилди Стив Уиткофф.

Ўз навбатида, АҚШ молия вазири Скотт Бессент 23 феврал куни Fox New телеканалига берган интервюсида: «Мен Зеленский минераллар бўйича битим имзолашини кутяпман», деди.

Зеленский АҚШ билан келишув бўйича музокараларнинг бориши ҳақида

Зеленскийнинг ўзи ҳам шу куни Вашингтон-Киев табиий ресурслар бўйича келишуви юзасидан музокаралар олға сурилаётганини айтди. «Ҳаммаси яхши», — дея унинг сўзларини келтиради Reuters.

Бундан ташқари, Украина президенти ресурслар келишуви хавфсизлик кафолатлари контекстида кўриб чиқилса, ўз мамлакатига АҚШ қўшинларининг киритилишини мантиқий қадам деб билишини таъкидлади.

Бир кун аввал Sky News телеканали аноним украиналик манбага таяниб, Киев нуқтайи назаридан, Украинанинг минерал ресурслари бўйича АҚШ томонидан таклиф этилган келишув «қатор муаммоли масалаларни ўз ичига олганини» хабар қилди. Хусусан, унда «Украинанинг фақат бир томонлама мажбуриятлари» мавжуд, шунинг учун Володимир Зеленский ушбу босқичда бу ҳужжатни имзолашга тайёр эмас, деди манба.

Айни пайтда Трампнинг миллий хавфсизлик бўйича маслаҳатчиси Майк Уолтц 21 феврал куни Мэриленд штатидаги чиқиши чоғида шундай деди: «Бу хулоса. Президент Зеленский бу битимни имзолайди ва буни тез орада кўрасиз».