Зеленский Трампга яна «йўқ» деди: «Украинанинг ўн авлоди тўлайдиган келишувни имзоламайман»

Бугун яна Доналд Трамп Украина президенти Зеленский имзолашини талаб қилаётган минерал ресурслар бўйича келишув ҳақида гаплашамиз. Трамп Байден маъмурияти Украинага юборган қурол-яроғ эвазига мамлакатдаги нодир металлар савдосидан тушаётган фойданинг ярмини йиллар давомида АҚШга беришини талаб қилмоқда. Зеленский эса бу Украинани сотиш эканини айтиб, келишув имзолашдан бош тортган. Ушбу келишув атрофида янги хабарлар пайдо бўлди, деб хабар қилмоқда Kun.uz нашри.

«Зеленский америкалик вазирга бақирган»

Иқтисодий хабарлар тарқатувчи энг ишончли манбалардан бўлмиш Financial Times нашрининг ёзишича, Зеленский Трампнинг Украинадаги минераллар устидан назорат ўрнатиш истагини етказган АҚШ молия вазири Скотт Бессентга бақириб жавоб берган. Нашр манбалари ёпиқ форматда ўтган учрашув хонасидан бақириқ овозларини эшитган.

Манбаларнинг айтишича, Америка молия вазири Скотт Бессент президент Зеленский Трамп сўраётган келишувни тезда имзолаши кераклиги ҳақида афтидан буйруқ оҳангида гапиргач, Зеленский унга бақирган. Америкалик вазир учрашув вақтида Вашингтон йиллар давомида Украинадаги нодир металлар савдосидан тушадиган пулнинг ярмини олишни исташи, шунингдек, мамлакатдаги газ, нефт захиралари, савдо портларини назорат қилишини тушунтирган. Зеленский эса Украинанинг бир нечта авлоди тўлашга мажбур бўладиган келишувни имзоламаслигини айтган.

Журналистларнинг қайд этишича, америкалик вазирнинг Зеленский билан бирга ўтказилган матбуот анжумани вақтида чиндан қаттиқ ҳаяжонланган ва қўли қалтираган. Зеленский вазир Скотт билан учрашув ҳақида гапираркан Трамп таклиф қилган келишувни Мюнхенда вице-президент Вэнс билан муҳокама қилишини билдирган.

Аввалроқ Трамп Зеленский АҚШ молия вазири билан учрашув вақтида унга қўполлик қилганини айтганди.

«Келишув шу ҳафта имзоланади»

ОАВда Зеленский америкаликларнинг навбатдаги таклифини рад этиб, минерал ресурслар бўйича келишув имзолашдан бош тортгани ҳақида хабар тарқалди. Зеленскийнинг охирги чиқишлари бу маълумотни тасдиқлайди. Бироқ Трампнинг махсус вакили Стив Уиткофф томонлар келишувни ушбу ҳафтада имзолашини айтди: «Менимча, келишув шу ҳафта имзоланади. Президент Трамп Зеленскийга сигнал юборди, у ортиқ иккилана олмайди», деди Уиткофф.

Трампнинг миллий хавфсизлик бўйича маслаҳатчиси Майк Уолтс ҳам Киев ва Вашингтон келишувга яқинлиги, у тез орада имзоланишини айтган.

Бироқ Володимир Зеленский 23 феврал куни Киевда ўтказилган катта матбуот анжуманида бу гапларни рад этувчи чиқиш қилди. Унинг айтишича, Трамп айтаётган келишув Украина олган ҳар бир долларини икки доллар қилиб қайтариши дегани. «Мен украинларнинг ўн авлоди тўлашга мажбур бўладиган келишувни имзоламайман», деди Зеленский.

Маълум бўлишича, Зеленский бу келишувни имзоламаслигига унда фақат Украинанинг мажбуриятлари кўрсатилгани сабаб. Зеленский АҚШдан хавфсизлик кафолати ва «бироз инсофли шартларда» келишув сўрамоқда. Шунингдек, Украина президенти келишувни фақат Доналд Трамп билан яккама-якка учрашув вақтида, АҚШ президенти Путин билан кўришишидан аввал имзоламоқчи.

“Замин” янгиликларини “Telegram”да кузатиб боринг