Фото: Reuters
Украина президенти Владимир Зеленский АҚШ президенти Доналд Трамп билан тортишганидан сўнг, Fox News телеканалига берган интервьюсида ўз мамлакатига кўрсатган ёрдами учун Қўшма Штатларга миннатдорчилик билдирди. Бироқ узр сўраши керакми, деган саволга салбий жавоб берди.
Украина етакчиси хавфсизлик кафолатлари ҳақидаги аввалги тезисларини такрорлаб, уларсиз ўт очишни тўхтатишга рози бўлмаслигини маълум қилди.
Аввалроқ, АҚШ Давлат котиби Марко Рубио Зеленскийни «бу ишни расво қилгани учун» узр сўрашга чақирган эди.
Овал кабинетдаги учрашув жанжал ва гап талашишга айланиб кетганидан сўнг, Украина томони бошқа хонага кирди, деб хабар берди CBS News. Шундан сўнг Трампнинг миллий хавфсизлик бўйича маслаҳатчиси Майк Уолц ва Давлат котиби Марко Рубио уларга Оқ уйни тарк этишни айтди. Телеканал манбаси сўзларига кўра, Зеленский вазиятни юмшатишга уриниб, учрашувни қайта тиклашни сўраган, бироқ Трамп ва бошқа АҚШ расмийлари Украина президентининг хатти-ҳаракатидан «ранжиган». Фойдали қазилмалар бўйича битим эса имзоланмади.
The Economist нашрининг ёзишича, Зеленский Оқ уйга келганида АҚШ-Украина муносабатлари аллақачон «мўрт ва ноаниқ» эди, бироқ у кетганида «парчаланди». Financial Times нашрига кўра, Оқ уйдаги учрашув имкон қадар ёмон бошланди. Зеленский АҚШ ва Россия етакчилари ўртасида қолди, улар Украина президенти билан эмас, кўпроқ ўзаро муросага келган кўринади. «Энди АҚШ Украинадан воз кечгани маълум бўлди», деб ёзди нашр.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
