АҚШда Зеленскийнинг истеъфога чиқиши зарурлиги ҳақида баёнотлар янграмоқда

^{Фото: Reuters}
Вашингтондаги бир қанча юқори мартабали амалдорлар Украина президенти Володимир Зеленский тинчлик келишувига эришиш учун истеъфога чиқишига тўғри келиши мумкинлигини тахмин қилишди. 2 март, якшанба куни AFP хабарига кўра, бу баёнотлар АҚШ президенти Доналд Трамп маъмуриятида Россиянинг Украинадаги урушига нисбатан ёндашувда ҳайратланарли ўзгаришлар юз берганидан далолат беради.

Шундай қилиб, АҚШ президентининг миллий хавфсизлик бўйича маслаҳатчиси Майк Уолтц CNN телеканалига берган интервюсида вазиятни изоҳлади. «Биз билан ишлай оладиган, охир-оқибат руслар билан иш олиб борадиган ва бу урушни тугатадиган раҳбар керак», деди Уолтц.

«Агар президент Зеленскийнинг шахсий ёки сиёсий мақсадлари бу мамлакатдаги жангларни тугатиш истагига зид экани аниқ бўлса, менимча, бизда ҳақиқий муаммо пайдо бўлади», — деди у.

Вакиллар палатаси спикери: Зеленский ўзига келиши керак

Шу билан бирга, АҚШ Вакиллар палатаси спикери Майк Жонсон 2 март куни Украина тинчлик келишуви йўлида давом этиши учун Зеленский «ўзига келиб, миннатдорчилик билан музокаралар столига қайтиши ёки мамлакатни бошқа кимдир бошқариши керак»лигига ишонч билдирди. «Президент (Доналд) Трамп бу икки томонни тинчликка олиб келишга ҳаракат қилмоқда», деди Жонсон NBC News телеканалининг Meet the Press дастурига берган интервюсида.

«Президент Зеленскийнинг Оқ уйда қилгани амалда биз учун у ҳали бунга (келишув) тайёр эмаслиги ҳақида сигнал бўлди ва менимча, бу катта умидсизлик», — дея қўшимча қилди Майк Жонсон. “Замин” янгиликларини “Telegram”да кузатиб боринг