Бутун дунё сиёсати ҳамон қишнинг охирги куни Оқ уйда содир бўлган Трамп ва Зеленский ўртасидаги тортишув таъсиридан чиқиб кетолмаяпти. Қандай воқеа содир бўлмасин, барибир ўша жанжал соясида қолиб кетмоқда. Трамп, Вэнс ва Зеленский Овал кабинетдаги «портлаш»дан кейин амалга оширган оммавий чиқишларида ҳар қанча бошқа мавзуда гапиришга интилмасин, барибир гап ўша мавзуга тортиб кетмоқда.
АҚШ ва Украина президенти тортишувидан кейин қандай муҳим баёнотлар берилганига тўхталамиз.
«Эшиклар ҳамон очиқ»
АҚШ вице-президенти Жей Ди Вэнс республикачилар минбари Fox News теленалига интервю берди. Вэнс Зеленский билан учрашув ҳақида гапираркан, дастлабки ярим соат давомида Трамп Украина президенти унга ёқмайдиган гаплар айтганида ҳам дипломатча ёндашувни сақлаб қолиб асабийлашмагани, лекин Зеленский ўша зайлда давом этгач вазият издан чиққанини айтди. Вэнс жанжал бошланишида Зеленскийни айблаган.
АҚШ вице-президентига кўра, Зеленский кейинчалик Оқ уйга қайтиб, Трамп билан гаплашишни истаган, лекин Трамп бунда маъни йўқлигини айтган. Бироқ Вэнс Трамп ва Зеленский ўртасидаги мулоқотни тиклаш учун эшиклар очиқлигини ҳам айтди.
«Президент Трамп бу ҳақда очиқ айтиб бўлди: мулоқот учун эшиклар ҳамон очиқ. Фақат бу учун Зеленский тинчлик ҳақида гаплашишга тайёр бўлиши керак. Овал кабинетга бориб тинчлик келишуви деталларини ҳатто муҳокама қилмаслик мумкин эмас. Агар улар тинчлик хоҳласа, менимча, президент Трамп гўшакни иккиланмай кўтаради», дейди Вэнс.
Трамп нима деди?
Доналд Трамп навбатдаги марта журналистлар иштирокида брифингда қатнашди. Ундан Украина билан минерал ресурслар бўйича келишувни сақлаб қолиш мумкинми, деб сўрашди. АҚШ президенти «Ҳа» деб жавоб берди. Кейин ундан Зеленский мулоқотни тиклаш учун нима қилиши кераклигини сўрашди.
«У бироз миннатдор бўлиши керак, ахир АҚШ энг қийин кунида ёнида бўлди. Биз уларга Европадан кўпроқ ёрдам бердик. Ваҳоланки, улар Европа учун тўсиқ. Украина Европа учун муҳим давлат, мен бу гапим билан Европани танқид қилмаяпман, шунчаки улар Байдендан анча ақлли ҳаракат қилишди. Барчаси тезроқ тугашини хоҳлайман. Уруш йиллар давомида чўзилиши керак эмас. Мен хушламайдиган AP нашри билан суҳбатда Зеленский уруш узоқ давом этади дебди. Ишқилиб у адашган бўлсин», деган Трамп.
Зеленский кечирим сўрайдими?
Германия бўлажак канцлери Фредрих Мерц Овал кабинетдаги жанжал ҳақида қизиқ гап айтди. «Мен Оқ уйдаги учрашувни бир неча марта қайта томоша қилдим ва суҳбат оҳангидан ҳайрон қолдим. Одатда бунақа учрашувларнинг очиқ қисми бир неча дақиқа давом этарди, лекин у ерда бошқача бўлди. Бу уюштирилган эскалация экани кўриниб турганди», деб Мерцнинг сўзларини келтирган «Европейская правда». Германия бўлажак лидерига кўра, Овал кабинетдаги жанжал «АҚШдаги амалдаги ҳукумат виждонига ҳавола».
Шу кунларда Америкада Зеленский камера қаршисида Трампдан кечирим сўраши кераклиги ҳақида чақирувлар янграмоқда. Хусусан, давлат котиби Марко Рубио ҳам шундай фикрда. Журналистлар Трампдан Зеленский кечирим сўраши керакми, деб ҳам сўрашди. Лекин BBC ўз манбаларига таяниб ёзишича, Зеленский Трампдан кечирим сўрамоқчи эмас. Жанжал бўлган куни Fox News телеканалига интервю берган Зеленскийнинг ўзи ҳам кечирим сўрайдиган иш қилмаганини айтганди.
Ўткир Жалолхонов тайёрлади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
