АҚШ президенти Дональд Трамп Владимир Путиннинг Украинадаги ҳаракатларини оқловчи баёнот берди. Унинг фикрича, Россия президенти ҳар қандай одам қилган ишни бажармоқда, чунки у вазиятни ҳал этишни хоҳлайди.
Трамп: “Путин табиий равишда қаттиқроқ ҳужум қилмоқда”
7 март куни Овал кабинетда бўлиб ўтган чиқиши давомида Трампдан Путиннинг Украинага ҳужумлари ҳақида сўралди. АҚШ президенти бу ҳолатни табиий деб баҳолади:
“Менимча, у ҳар қандай бошқа одам қилган ишни қилаяпти. У буни тўхтатиш ва муаммони ҳал қилишни хоҳлаяпти, деб ўйлайман. У аввалгидан ҳам қаттиқроқ зарбалар бераётган бўлиши мумкин. Ва, аниқки, унинг ўрнида бўлган ҳар қандай киши ҳозир айнан шундай йўл тутган бўларди”, — деди Трамп.
АҚШ Украинадан чиқиб кетиши мумкин
Трамп маъмурияти 4 март куни Украинага ҳарбий ёрдамни тўхтатди, кейинроқ эса Киевга разведка маълумотларини тақдим этишни бас қилди. Бу ҳолат Киевга Россия ҳудудидаги ҳарбий нишонларга зарба бериш учун керакли маълумотларни олиш имкониятини чеклади.
“Мен улар (Украина) битим тузишни хоҳлаётганини билишим керак. Агар Киев урушни ҳал этишни истамаса, биз у ердан чиқиб кетамиз”, — деди Трамп.
“Россия билан ишлаш Украинага қараганда осон”
Трамп Россия президенти Владимир Путинга ишонаётганини ва у билан иш олиб бориш Украинага қараганда осонроқ эканини таъкидлади.
“Бизда Россия билан ҳаммаси яхши, деб ўйлайман, аммо айни вақтда улар гўё лаънатланганлардек Украинани бомбардимон қилишяпти. Украина билан эса ишлаш анча қийин”, — дея қўшимча қилди у.
Трамп: “Москва музокарага келмаса, қаттиқ санкциялар қўллаймиз”
Шу билан бирга, Трамп Россияни огоҳлантириб, Путин Украина билан музокара ўтказишдан бош тортса, Москвага нисбатан кенг кўламли иқтисодий санкциялар жорий этилишини маълум қилди.
“Россия ҳозир жанг майдонида Украинани эзиб ташлаётганини инобатга олган ҳолда, мен Россияга нисбатан кенг қамровли банк санкциялари ва божхона тўловларини жорий этишни жиддий кўриб чиқяпман. Бу чоралар ўт очишни тўхтатиш ва якуний тинчлик келишувига эришилгунга қадар давом этади”, — деди Трамп.
Россия ҳужумларини кучайтирди
АҚШ Украинага ёрдамни тўхтатганидан сўнг Россия армияси Киев ва бошқа шаҳарларни қаттиқ бомбардимон қилди.
Украина президенти Володимир Зеленскийнинг сўзларига кўра, 7 мартга ўтар кечаси Россия 70 га яқин ракета ва қарийб 200 та дрон учирган. Ҳужумлар асосан энергетика инфратузилмаси ва фуқаролик объектларига қаратилган.
Дональд Трампнинг Путинни оқлашга урингани ва Украинани танқид қилгани жаҳон ҳамжамиятида турли муаммоларни келтириб чиқариши мумкин. Шу билан бирга, Вашингтоннинг Киевга ёрдамни тўхтатиши Россия учун катта стратегик имкониятлар очиб бермоқда. Украина эса ғарб ҳамкорларидан ҳали ҳам аниқ қўллаб-қувватлашни кутаяпти. Келгуси кунларда Киев ва Москва ўртасидаги вазият қандай кечиши кўп жиҳатдан АҚШнинг кейинги қарорларига боғлиқ бўлади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
