Россия Курск областида Украина қўшинларини қуршаб олишга уринмоқда

Россия қўшинлари Курск областидаги Украина мудофаасини ёриб ўтиб, минтақадаги Украина Қуролли кучлари гуруҳини қуршаб олишга ҳаракат қилмоқда. Бу ҳақда 7 март куни бир қанча ҳарбий таҳлилчилар ва оммавий ахборот воситалари хабар берди.

DeepState таҳлили: Ҳужумлар кучайиши ва КХДР ҳарбийлари

Украинанинг DeepState лойиҳаси маълумотига кўра, Россия қўшинлари Куриловка қишлоғидан жанубда жойлашган Украина Қуролли кучлари позицияларини тахминан 5 км масофага ёриб ўтиб, Украинанинг Суми области билан давлат чегарасига деярли етиб келган. Лойиҳа таҳлилчилари Россиянинг бу ҳужумда Шимолий Корея (КХДР) ҳарбийларидан фойдаланаётганини таъкидламоқда.

DeepState'нинг қайд этишича, Россия қўшинларининг бу йўналишдаги асосий мақсади Украина Қуролли кучларининг таъминот линияси бўлган H07 автомагистралини назоратга олишдир. Ҳозирда рус қўшинлари бу йўлга 6 км масофага яқинлашган.

Россиянинг икки йўналишда ҳужуми

Россия Қуролли кучлари ҳозирда шимолий ҳудудлардан ҳам ҳужумларни кучайтирмоқда. Уларнинг қўшинлари давлат чегарасини кесиб ўтиб, Украинанинг Суми областида жойлашган Журавка ва Новенкое қишлоқларига ҳужум қилган. Бу ҳаракат Россияга H07 йўли ва Суджа чегара пунктига яқинлашиш имконини беради. Ҳозирда рус қўшинлари бу йўналишда 5 км масофада жойлашган.

Украина Қуролли кучларининг жавоби

«Украинская правда» нашрининг Курск областидаги Украина ҳарбийлари орасидаги манбаси маълум қилишича, бу ҳудудда Украина мудофааси қисман ёки тўлиқ қуршаб олиниш хавфи остида қолмаслик учун рус қўшинларини жиловлашга ҳаракат қилмоқда.

Манбанинг сўзларига кўра, Россия бу ҳудудда аста-секин ва тизимли равишда ҳужум операцияларини амалга оширган. «Янги йил олдидан руслар Куриловкага кирди, у ерда бизнинг бир бригада ўз позицияларини ташлаб кетди. Шундан сўнг, душман ўз кучларини жипслаштирди ва ҳужум операцияларини босқичма-босқич амалга оширди. Кеча ва бир кун олдин улар муайян муваффақиятга эришди», — дейди ҳарбий манба.

Ҳозирда Украина Қуролли кучлари вазиятни барқарорлаштиришга ва душманнинг алоқа йўлларини тўлиқ назоратга олишининг олдини олишга ҳаракат қилмоқда.

Бу вазият Украина учун жиддий стратегик аҳамиятга эга бўлиб, ҳудуддаги ҳарбий ҳаракатларнинг келгуси ривожи ҳар иккала томон учун ҳам ҳал қилувчи бўлиши мумкин. “Замин” янгиликларини “Telegram”да кузатиб боринг