Жанубий Корея прокуратураси президент Юн Сок Ёлни озод қилди

Жанубий Корея прокуратураси мамлакатда қисқа муддатли ҳарбий ҳолат жорий этилгани сабабли исёнда айбланиб ҳибсга олинган Юн Сок Ёлни ҳибсдан озод қилди.

Yonhap нашрининг ёзишича, прокуратура бир муддат олдин ҳибсга олиш ордерини бекор қилган суд қароридан сўнг президент озодликда экан, далилларни йўқ қилишга уриниши ва ишга оид шахслар билан учрашишидан хавотир билдирган эди. Бироқ энди суд қарори устидан шикоят қилмасликка қарор қилган.

Мавжуд маълумотларга кўра, Юн Сок Ёл аллақачон тергов изоляторини тарк этган. Уни тарафдорлари кутиб олишди.

Сеул марказий округ суди кеча ҳибсни бекор қилиш ва Юн Сок Ёлни озод қилишга қарор қилган эди. Судьялар прокурорлар қўзғолон бўйича расмий айбловларни қўйишда бир неча соат кечикишганини аниқлаган.

Январь ойи ўрталарида Коррупцияга қарши юқори даражадаги тергов идораси Юн Сок Ёлни ҳарбий ҳолат воқеалари туфайли конституциявий тузумга қарши исён кўтаришда айблаб ҳибсга олган эди. Кейин Сеулнинг Ғарбий туман суди уни ҳибсга олишга қарор қилган. “Замин” янгиликларини “Telegram”да кузатиб боринг