Эрон олий раҳбари Али Хоманаий АҚШ ва қудратли давлатлар томонидан таклиф этилаётган музокараларни кескин рад этди. Унинг фикрича, бу каби музокаралар ҳақиқий муаммоларни ҳал қилиш учун эмас, балки сиёсий ҳукмронлик ва босим ўтказиш мақсадида таклиф қилинмоқда.
«Айрим қудратли давлатларнинг музокара таклифлари муаммоларни ҳал қилиш учун эмас, балки ҳукмронлик қилиш ва ўз манфаатларини рўёбга чиқаришга қаратилган. Эрон уларнинг умидларини албатта қабул қилмайди», — деди Хоманаий.
Эрон АҚШнинг музокара таклифини рад этди
Сўнгги кунларда АҚШ президенти Дональд Трамп Эрон раҳбариятига мактуб йўллагани ва мамлакатнинг ядровий дастури билан боғлиқ хавотирлар юзасидан музокаралар ўтказишни таклиф қилгани ҳақида хабарлар тарқалган эди.
Бироқ, Эроннинг БМТдаги ваколатхонаси ҳеч қандай мактуб қабул қилинмаганини маълум қилди. Теҳрон музокаралар ўтказиш эҳтимолини ҳам рад этди.
Ядровий битим ва Европа билан муносабатлар
Хоманаий нутқида Европа давлатларини ҳам танқид қилди. Унинг сўзларига кўра, Европа Эроннинг ядровий келишув бўйича мажбуриятларини бажармагани ҳақида гапирмоқда, лекин ўзлари бу битимни амалга ошириш учун ҳаракат қилмаган.
«Сиз Эрон ўз мажбуриятларини бажармаганини даъво қиласиз. Хўш, ўзингиз бу мажбуриятларни бажардингизми? Сиз биринчи кунданоқ беҳаракатсиз», — деди Эрон олий раҳбари.
Шунингдек, Хоманаий АҚШ биринчи бўлиб ядровий келишувдан чиққанини ва Европанинг бу бўйича ҳеч қандай реал чора кўрмаганини таъкидлади.
Трампнинг муносабати ва Эрондаги сиёсий қарама-қаршилик
Трамп ўтган ой Эрон билан янги ядровий келишувга эришиш имконияти борлигини билдирган. У Эронни «бомбардимон қилмасдан» келишувга эришмоқчи эканлигини айтган.
7 март куни Трамп «Эрон билан муносабатларда қизиқ вақтлар яқинлашяпти» деб таъкидлади.
Шу билан бирга, Эрон президенти Масъуд Пизишкиён АҚШ билан музокаралар ўтказиш зарурлигини билдирган эди. Бироқ, Али Хоманаий бунга қарши чиқди ва мамлакат позицияси қатъий эканини маълум қилди.
Бу ҳодиса Эрондаги ички сиёсий зиддиятларни ҳам кўрсатиб турибди – бир тараф музокаралар тарафдори бўлса, олий раҳбарлик бунга йўл қўймаяпти.
Яқин вақтларда АҚШ ва Эрон муносабатларида жиддий кескинлик юзага келиши эҳтимоли ошмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
