Илон Маск Украинадаги урушни тўхтатиш бўйича таклифлар берди

Таниқли миллиардер, тадбиркор ва SpaceX ҳамда Tesla раҳбари Илон Маск Украинадаги урушни тўхтатиш бўйича бир қатор таклифлар билан чиқди. Бу ҳақда у Х (собиқ Twitter) ижтимоий тармоғида ёзган. Маскнинг фикрича, урушни тугатиш учун стратегик ва иқтисодий чоралар кўрилиши керак.

Starlink тизимини ўчириш таклифи

Маскнинг энг баҳсли таклифларидан бири – Украина армиясининг муҳим алоқа воситаси бўлган Starlink сунъий йўлдош интернет тизимини ўчириш ҳисобланади. Унинг таъкидлашича, агар Starlink фаолияти тўхтатилса, Украина қуролли кучлари фронт чизиғида жиддий қийинчиликларга дуч келади ва бу урушни тугатишга хизмат қилади.

Айни пайтда Украина ҳарбийлари Starlink’дан алоқа учун фойдаланиб келмоқда. Бу тизим ҳарбийлар учун муҳим стратегиявий ресурс бўлиб, жанговар ҳаракатлар давомида катта аҳамиятга эга. Маскнинг бу таклифи Украина ва Ғарб давлатлари томонидан кескин танқид қилиниши мумкин.

Украина олигархларига қарши санкциялар

Илон Маск Украинадаги урушни тўхтатишнинг яна бир йўли сифатида мамлакатнинг энг йирик бизнесменларига нисбатан халқаро санкциялар жорий этилишини таклиф қилди. Унинг фикрича, агар бу тадбир амалга оширилса, уруш дарҳол тўхташи мумкин.

"Украинанинг энг йирик ўн нафар олигархига, айниқса, Монакода қасрлари бўлганларга қарши санкциялар киритинг ва уруш дарҳол тўхтатилади. Мана жумбоқнинг калити", – деб ёзди Маск.

Шу билан бирга, миллиардер аниқ қайси олигархлар таҳдид остида бўлиши кераклигини очиқламаган. Маълумки, 2021 йилда АҚШ украиналик бизнесмен Игор Коломойский ва унинг оиласига қарши санкциялар жорий қилган эди. Коломойский 2014—2015 йилларда Днепропетровск вилояти губернатори сифатида коррупцияда айбланган.

Вашингтоннинг санкция режалари

Washington Mail нашри манбаларига кўра, 2025 йил февраль ойида АҚШ Одесса мэри Геннадий Трухановга қарши санкциялар жорий этиш имкониятини кўриб чиқаётган эди. Америка расмийлари Трухановни Одесса жиноий гуруҳи билан алоқадорликда ҳамда оффшор компанияларда катта улушга эгалик қилишда айбламоқда.

Илон Маскнинг таклифлари халқаро майдонда турли баҳсларга сабаб бўлиши мумкин. Унинг фикрича, урушни иқтисодий босим орқали тўхтатиш мумкин, аммо бу чоралар қандай натижа бериши ҳали номаълум. Бу таклифлар Вашингтон, Киев ва Москва томонидан қандай қабул қилиниши эса вақт ўтиши билан аниқлашади. “Замин” янгиликларини “Telegram”да кузатиб боринг