Истанбулда «Хирқаи шариф» кўргазмаси очилди

Муқаддас Рамазон ойи муносабати билан Истанбул шаҳридаги «Хирқаи шариф» жомеъ масжиди зиёратчилар учун ўз эшикларини очди. Бу ерга ташриф буюрувчилар Пайғамбаримиз Муҳаммад соллаллоҳу алайҳи ва салламнинг муборак хирқаларини зиёрат қилиш имкониятига эга.

Тантанали очилиш маросими

Кўргазма очилишида Истанбул шаҳар ҳокими, муфтий, шунингдек, Пайғамбаримиз алайҳиссаломнинг хирқаларини асраб-авайлаб келаётган Увайс Қараний сулоласи вакиллари қатнашди. Кўргазма Anadolu ахборот агентлиги томонидан кенг ёритилди.

Масжид ёнида хирқаи шарифни зиёрат қилиш истагида бўлган зиёратчиларнинг узун навбати ҳосил бўлгани кузатилмоқда. Ногиронлар, кексалар, ҳомиладор аёллар ва беморлар учун махсус шароитлар яратилган бўлиб, улар навбатсиз киритилади.

Кўргазма иш вақтини билиб олинг

Зиёратчилар Рамазон ойи давомида хирқани қуйидаги вақтларда томоша қилишлари мумкин:

• Душанба—жума: 10:00–17:00
  
• Шанба ва якшанба (дам олиш кунлари): 09:00–17:30
  

Хирқаи шариф тарихи

Пайғамбаримиз Муҳаммад алайҳиссалом умрларининг охирида ўз муборак хирқаларини ҳазрати Умар ва ҳазрати Али розияллоҳу анҳуга топшириб, уни Увайс Қараний раҳматуллоҳи алайҳига етказишни васият қилганлар. Увайс Қараний вафотидан сўнг бу муқаддас омонат унинг авлодлари томонидан асраб-авайланган.

XVII асрда Усмоний султони Аҳмад I илтимоси билан Қараний сулоласи вакиллари Истанбулга кўчиб келган. 1847 йили султон Абдулмажид кўрсатмаси билан «Хирқаи шариф» масжиди қурилиб, бу муқаддас ёдгорлик шу ерда сақлана бошлади. Ҳозирда хирқа Қараний сулоласининг 59-авлоди муҳофазасида.

Тўпқопи саройидаги «Хирқаи саодат»

Истанбулдаги Тўпқопи саройида Расулуллоҳ соллаллоҳу алайҳи ва салламга тегишли яна бир чакмон – «Хирқаи саодат» ҳам сақланади. Бу муборак либос Пайғамбаримиз томонидан машҳур шоир Каъбга туҳфа қилинган. Султон Салим 1517 йили Мисрни забт этганида, ушбу хирқани ҳам Истанбулга олиб келган.

Истанбулдаги «Хирқаи шариф» кўргазмаси мусулмонлар учун муҳим маънавий воқеалардан бири ҳисобланади. Ҳар йили минглаб зиёратчилар Рамазон ойида ушбу муқаддас ёдгорликни зиёрат қилиш учун ташриф буюрадилар. Ҳозирда ҳам масжид атрофида зиёратчиларнинг узун навбатлари ҳосил бўлган бўлиб, бу муқаддас меросга бўлган чуқур ҳурматни кўрсатади. “Замин” янгиликларини “Telegram”да кузатиб боринг