Украина президенти Володимир Зеленский февраль охирида Овал кабинетда юз берган тортишув учун АҚШ президенти Доналд Трампдан кечирим сўради. Бу ҳақда АҚШ президентининг Яқин Шарқ бўйича махсус вакили Стиф Уиткофф маълум қилди.
Fox News телеканалида чиқиш қилган Уиткоффнинг сўзларига кўра, Зеленский Оқ уйда юз берган можаро учун расмий равишда кечирим сўраб, Трампга мактуб йўллаган.
"Зеленский президентга мактуб йўллади. У Овал кабинетда юз берган можаро учун кечирим сўради. Ўйлайманки, бу муҳим қадам бўлди ва бизнинг жамоаларимиз, шунингдек, ушбу воқеага алоқадор украиналиклар ва европаликлар ўртасида кўплаб мунозаралар бўлиб ўтди", — деди Уиткофф.
Бироқ Зеленскийнинг айнан қандай "кечирим сўраши" назарда тутилгани ва у Трампга қандай мактуб йўллагани борасида ҳалигача аниқлик йўқ.
Зеленский Оқ уйдаги учрашув ҳақида афсусда эканини билдирган
4 март куни Зеленский Х ижтимоий тармоғида учрашувдан кейинги таассуротлари ҳақида ёзиб, Оқ уйдаги учрашув кутилаганидек ўтмаганини тан олган.
"Бундай бўлганидан афсусдаман. Барчасини тўғирлаш вақти келди. Келгуси ҳамкорлик ва мулоқот конструктив бўлишини истаймиз", — дейилади Украина етакчисининг постида.
Трамп эса конгресс қаршисида қилган чиқишида Зеленскийдан муҳим мактуб олганини маълум қилди ва "хабар учун миннатдор эканини" таъкидлади.
Шу билан бирга, Украинанинг АҚШдаги элчиси Оксана Маркарова Зеленский томонидан Трампга алоҳида мактуб ёзилмаганини билдирди. Унинг сўзларига кўра, Трамп конгрессга мурожаатида Украина президентининг 4 мартдаги постидан иқтибос келтирган.
Овал кабинетдаги тортишув ва унинг оқибатлари
28 февраль куни Овал кабинетда ўтказилган тадбирда Украина президенти Володимир Зеленский ва АҚШ вице-президенти Жей Ди Вэнс ўртасида тортишув содир бўлган.
Шундан кейин Украина раҳбари учрашувни муддатидан олдин тарк этган ва икки давлат ўртасидаги нодир металлар бўйича битим имзоланмай қолган.
Кейинроқ, АҚШ давлат котиби Марко Рубио Зеленскийни Оқ уйдаги тортишув сабаб кечирим сўраши керак эканини таъкидлади. Бироқ Украина президенти бу талабга риоя қилиш ниятида эмаслигини билдирган.
Зеленский ва Трамп ўртасидаги муносабатларнинг бу ҳолати икки давлат ҳамкорлигига қандай таъсир қилиши ҳали аниқ эмас. Аммо таҳлилчилар Украина президентининг позицияси АҚШдан келаётган ҳарбий ва иқтисодий ёрдам масаласига таъсир қилиши мумкинлигини таъкидлашмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
