Путин Курск областига ташриф буюрди: Украина билан урушнинг янги босқичи

Россия президенти Владимир Путин Украина Қуролли кучлари минтақада операция бошлаганидан бери биринчи марта Курск областига ташриф буюрди, деб хабар беради ТАСС.

Қўмондонлик йиғилиши ва ҳарбий ҳисоботлар

12 март куни Путин Курск қўшинлари гуруҳи қўмондонлик пунктларидан бирида йиғилиш ўтказган. Кремль йиғилиш аниқ қаерда ўтказилгани ҳақида маълумот бермаган.

Оқ рангдаги камуфляж кийган Путин Россия Бош штаби бошлиғи Валерий Герасимовнинг ҳисоботини тинглади. «Россия-24» телеканали йиғилишдан видеоларни эфирга узатди.

Герасимов Россия ҳарбийлари Курск областида 1000 квадрат километрдан ортиқ ҳудудни эгаллаганини маълум қилди. Унинг сўзларига кўра, охирги беш кунда 24 та аҳоли пункти озод этилган, шунингдек, Россия қўшинлари Суми областига ҳам кириб борган.

Герасимов Курск областидаги Украина Қуролли кучларининг «изоляция қилингани» ва уларни режали йўқ қилиш ишлари давом этаётганини таъкидлади. Россия Бош штаби маълумотларига кўра, Украина армияси минтақада 67 мингдан ортиқ ҳарбий хизматчисини йўқотган.

Путиннинг баёноти ва хавфсизлик масалалари

Путин ҳарбийларга «душманни қисқа муддатда яксон қилиш ва Курск областини тўлиқ озод этиш» вазифасини қўйди. Унинг таъкидлашича, келажакда Россия давлат чегарасида хавфсизлик зонасини яратиш ҳақида ўйлаш керак бўлади.

Шунингдек, Путин Курск областида асирга олинган барча украиналик ҳарбийларга «террорчи» сифатида муносабатда бўлиш кераклигини билдириб, қўшимча қилди:

«Биз биринчи навбатда, Россия қонунларидан келиб чиқиб, бу инсонларга террорчи сифатида муносабатда бўлишимиз керак. Биз барча одамларга инсоний муносабатдамиз ва келажакда ҳам шундай бўлиши лозим. Шу билан бирга, эслатиб ўтаманки, чет эллик ёлланма аскарлар 1949 йилги Женева конвенциясига кирмайди».

Украина ҳужуми ва ҳудудларнинг қайта қайтарилиши

2024 йил август ойида Украина Қуролли кучлари Курск областининг қатор аҳоли пунктларини эгаллаб олган эди. АҚШ Украинага разведка маълумотларини беришни тўхтатгач, март ойида Россия қўшинлари ушбу ҳудудларнинг бир қисмини қайтариб олди.

12 март куни Россиядаги урушни ёқловчи телеграм-каналларда Суджа марказида Россия байроғини ўрнатаётган ҳарбийлар акс этган видеолар тарқалди. Conflict Intelligence Team суриштирув лойиҳаси асосчиси Руслан Левиев Суджа шаҳри деярли тўлиқ Россия назоратига ўтганини ва Украина армияси ҳудудни жангсиз тарк этаётганини билдирди.

Владимир Путиннинг Курск областига ташрифи Россия-Украина можаросида янги босқични англатиши мумкин. Россия ҳарбийлари ҳудудларни қайта назоратга олишни давом эттираётган бўлса, Украина армияси стратегиясини қайта кўриб чиқиши кутилмоқда. Мазкур жараёнлар минтақадаги ҳарбий-сиёсий вазиятни янада мураккаблаштириши мумкин. “Замин” янгиликларини “Telegram”да кузатиб боринг