Америкалик сенатор Россияни сулҳга рози бўлишга чақирди ва санкциялар билан таҳдид қилди

Америкалик республикачи сенатор Линдси Грем Россияни 30 кунлик ўт очишни тўхтатишга рози бўлишга чақириб, акс ҳолда янги санкциялар жорий этилиши мумкинлигини маълум қилди. Бу ҳақда у ўзининг "X" ижтимоий тармоғидаги саҳифасида ёзган.

Грем Украина томонидан АҚШнинг 30 кунлик ўт очишни тўхтатиш таклифи қабул қилингани ҳақида эшитганидан мамнунлигини билдирди.

"Трамп жамоаси, баракалла. Умид қиламанки, Россия ҳам шунга амал қилади. Агар Россия рад этса, биз унга қарши санкциялар қўллашимиз керак", — деди сенатор.

Грем Конгресс томонидан Россияга нисбатан кучайтирилган санкцияларни жорий этиш кераклигини таъкидлади. У бу чекловлар нафақат Россияга, балки унинг товарларини, жумладан, нефть, газ ва уранни сотиб олувчи давлатларга ҳам таъсир кўрсатиши кераклигини айтди.

"Россия Украинага қўпол бостириб кириши натижасида аллақачон енгиб бўлмас иқтисодий оғриқни ҳис қилиши керак эди", — дея қўшимча қилди Грем.

Маълумотларга кўра, Саудия Арабистонида АҚШ ва Украина делегациялари ўртасида 9 соат давом этган учрашувда Украина 30 кунлик ўт очишни тўхтатиш таклифини қабул қилган, бироқ бу шарт Россиянинг ҳам розилигига боғлиқлиги таъкидланган.

Кремль Жиддада ўтказилган музокараларда илгари сурилган таклифларни ўрганаётганини маълум қилди. Москва АҚШ томонидан музокаралар тафсилотлари бўйича расмий маълумот берилишини кутаётганини билдирди. «Замин»ни Telegram’да ўқинг!