Зеленский: Украина босиб олинган ҳудудларни Россияга тегишли деб тан олмайди

Украина президенти Владимир Зеленский Киев ҳеч қачон Россия томонидан босиб олинган ҳудудларни тан олмаслигини яна бир бор таъкидлади. Унга кўра, бу масала Украина учун "асосий қизил чизиқ" бўлиб қолади. Бу ҳақда у 12 март куни Жидда шаҳридаги АҚШ-Украина музокараларидан сўнг ўтказилган брифингда маълум қилди.

"Ҳеч қачон тан олмаймиз"

Зеленский мамлакат суверенитетини ҳимоя қилиш учун Украина халқи катта қурбонликлар берганини таъкидлади:

"Биз Россия томонидан босиб олинган ҳеч қайси ҳудудни уларники деб тан олмаймиз. Бу – ҳақиқат. Халқимиз бунинг учун курашди, қаҳрамонларимиз ҳаётини фидо қилди. Жуда кўп инсон яраланди, жуда кўп азоб чекилди. Шу сабабли ҳеч ким буни унутмайди. Мен "ҳеч ким унутмайди" деганимда, бу биз учун асосий қизил чизиқ эканини назарда тутяпман", – деди Украина етакчиси.

АҚШ–Украина музокаралари ва 30 кунлик сулҳ

Саудия Арабистонида бўлиб ўтган музокаралардан сўнг АҚШ Украинага ҳарбий ёрдам ва разведка маълумотлари алмашинувини тиклади. Шунингдек, Киев Вашингтон таклиф қилган 30 кунлик ўт очишни тўхтатиш режасига розилик билдирди. Бу муддат давомида томонлар урушни бутунлай тугатиш бўйича музокаралар ўтказиши кутилмоқда.

Жиддада илгари сурилган таклиф дунёнинг етакчи давлатлари томонидан ижобий қабул қилинди. Бироқ ҳозир ҳамма Москванинг расмий жавобини кутмоқда.

Кремль музокаралар бўйича жавоб беришга шошилмаяпти

Россия президенти матбуот котиби Дмитрий Песков Кремль мазкур таклифни "тафсилотлари билан ўрганиши лозим" эканини маълум қилди. Москва расмий позициясини эълон қилишдан аввал музокара шартларини таҳлил қилаётганини таъкидлади.

Санкциялар таҳдиди

АҚШ сенаторларидан бири Россия вақтинчалик сулҳга рози бўлиб, музокаралар столига ўтириши кераклигини айтди. Акс ҳолда, Қўшма Штатлар Москвага қарши қўшимча санкциялар қўллашини маълум қилди.

Украина ҳукумати босиб олинган ҳудудларни Россия таркибида тан олишни мутлақо рад этмоқда. Киев АҚШ таклиф қилган 30 кунлик ўт очишни тўхтатиш таклифига рози бўлди, аммо Россия ҳали жавоб бермаган. Кремль музокара шартларини ўрганаётганини таъкидламоқда, АҚШ эса Москвадан тезкор қарор кутаётганини маълум қилмоқда. Агар Россия музокараларга қўшилмаса, янги санкциялар жорий қилиниши мумкин. “Замин” янгиликларини “Telegram”да кузатиб боринг