Россия ҳарбийлари Путиннинг буйруғидан сўнг Украинага учирилган ўз дронларини уриб туширди

Россия ҳарбийлари президент Владимир Путиннинг Украина энергетика объектларига зарба беришни вақтинча тўхтатиш ҳақидаги буйруғини олгач, Украина томон учирилган ўз учувчисиз қурилмаларини (дронларини) уриб туширишга мажбур бўлган. Бу ҳақда Россия Мудофаа вазирлиги расман маълум қилди.

Вазирликнинг баёнотида таъкидланишича, буйруқ келиб тушган пайтда Россия қўшинлари томонидан Украина ҳудудига қараб еттита зарбдор дрон учирилган эди. Улар Миколайив вилоятида жойлашган, ҳарбий-саноат мажмуаси билан боғлиқ энергетика объектларига йўналтирилган бўлган.

Россия Федерацияси ҳаво мудофаа кучларига мазкур учувчисиз қурилмаларни зарарсизлантириш буйруғи берилган ва натижада олтита дрон «Панцир» зенит-ракета тизимлари, яна бири эса Россия ҳарбий-ҳаво кучларининг қирувчи самолёти томонидан уриб туширилган.

Мудофаа вазирлигининг таъкидлашича, ушбу воқеа Россия президенти Владимир Путин ва АҚШ президенти Доналд Трамп ўртасидаги телефон мулоқотидан кейин содир бўлган. Кремл музокаралардан сўнг Путиннинг Украинадаги энергетика тизимига 30 кун давомида зарба беришни тўхтатиш ҳақида буйруқ берганини эълон қилган эди.

Шунингдек, Россия вазирлиги мазкур келишувдан бир неча соат ўтиб Украина Краснодар ўлкасининг Кавказская станицасидаги энергетика инфратузилмасига учта дрон ёрдамида зарба берганини ҳам маълум қилди. Ҳужум натижасида бир нефт резервуари зарар кўрган ва ёнғин келиб чиққан.

Россия ушбу ҳужумни АҚШнинг тинчлик ташаббусларини бузишга қаратилган махсус провокация, деб баҳоламоқда.

Украина қуролли кучлари ҳарбий-ҳаво кучларининг 19 март кунги ҳисоботида Россия қўшинлари Украинага «Искандер-М», С-300 ракеталари ва «Shaheed» туридаги 145 та дронлар билан ҳужум қилгани айтилган.

Украина президенти Владимир Зеленский энергетика инфратузилмасига қарши ҳужумларнинг тўхтатилишини қўллаб-қувватлаган ҳолда, бундай зарбалар содир бўлган тақдирда Украина томонидан кескин жавоб қайтарилишини таъкидлади.

Зеленский ҳозирча АҚШ собиқ президенти Трамп билан суҳбат ўтказмагани, аммо бу мулоқот орқали Россия билан келишувлар бўйича кўпроқ маълумотга эга бўлиш истагида эканлигини билдирди. «Россия бизнинг энергетика объектларимизга зарба берар экан, биз жим турмаймиз. Албатта, биз ҳам жавоб қайтарамиз», – деди Зеленский. “Замин” янгиликларини “Telegram”да кузатиб боринг