Исроилда “Қатаргейт” иши бўйича тергов доирасида икки гумонланувчи ҳибсга олинди. Улар Исроил бош вазири Бинямин Нетаньяҳунинг идораси ва Қатар вакиллари ўртасидаги эҳтимолий алоқалар юзасидан сўроқ қилиниши керак. Бу ҳақда Исроил полицияси душанба куни баёнот берганини КАН агентлиги хабар қилди.
Ҳибсга олинганлар кимлар?
Полиция расмийларининг маълумотларига кўра, ҳибсга олинган шахсларнинг исмлари ошкор этилмаган. Бироқ Исроилнинг 12-канали тарқатган хабарга кўра, ҳуқуқ-тартибот органлари Нетаньяҳунинг катта маслаҳатчиси Ёнатан Урих ва собиқ матбуот котиби Эли Фелдштейнни ҳибсга олган.
Телеканал манбаларига кўра, терговчилар ҳибсга олинганлардан пулнинг манбаси, улар Қатар учун ишлаган ёки ишламагани ҳақида аниқлик киритишни талаб қилмоқда. Бу ҳолат Исроил ҳукуматида катта сиёсий можарони келтириб чиқариши мумкин.
Терговни ким олиб бормоқда?
Бу иш бўйича текширувни Исроил полициясининг “Лахав 433” жиноятчиликка қарши курашиш бўйича миллий бўлинмаси ва Умумий хавфсизлик хизмати (ШАБАК) олиб бормоқда. Илгари ШАБАК Исроил бош вазири идораси ходимлари ва Қатар амалдорлари ўртасидаги эҳтимолий алоқаларни текшириш билан шуғулланган эди.
Қатарнинг иштироки қандай?
Times of Israel нашрининг маълумотига кўра, Исроил бош прокурори Гали Баҳарав-Миара аввалроқ Исроил мудофаа кучларининг махфий ҳужжатларини ошкор қилишда айбланган Эли Фелдштейн Қатар ёллаган халқаро фирма орқали ушбу давлат учун ишлагани ҳақида маълумотлар топилганидан сўнг, текширувни бошлаш ҳақида қарор чиқарган.
Нашрга кўра, Фелдштейн Қатар томонидан молиялаштирилган кампанияда иштирок этган ва исроиллик журналистларни Қатар тарафдори материаллар билан таъминлаган.
Жаҳон чемпионати ва Нетаньяҳу ёрдамчилари
Шунингдек, 2022 йилги жаҳон чемпионати арафасида Нетаньяҳунинг ёрдамчилари Ёнатан Урих ва Исроил Айнхорн Қатарда жамоатчилик билан алоқаларни йўлга қўйгани ҳақида хабарлар тарқалган.
Суд тергов тафсилотларини ошкор этишни тақиқлади
Исроил суди мазкур тергов тафсилотларини оммага ошкор этишни тақиқлаган. Ҳозирча Нетаньяҳу ва унинг идораси мазкур ҳолат бўйича расмий изоҳ бермаган. Аммо ушбу можаро Исроил сиёсий ҳаётида катта шов-шувга сабаб бўлиши кутилмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
