Трамп Украинада сулҳдан умид узди ва Россияга қарши янги санкциялар тайёрламоқда

АҚШ президенти Доналд Трамп маъмурияти Украина бўйича тинчлик келишувини тузиш тез фурсатда амалга ошмаслиги ҳақида хулоса чиқарди. Бу ҳақда Reuters агентлиги манбалари маълум қилди. Вашингтондаги расмийлар Россия ва Украина ўртасидаги уруш яқин ойларда тўхтамаслигини тан олган ҳолда, можарони дипломатик йўл билан ҳал этиш эҳтимоли жуда камлигини таъкидламоқда.

Шу муносабат билан АҚШ маъмурияти Россия ва Киевга босим ўтказишнинг янги механизмларини ишлаб чиқмоқда. Fox News журналисти Жеки Ҳайнрихнинг хабар беришича, Доналд Трамп Владимир Путиндан норози ва Россия раҳбарияти тинчлик музокараларини сунъий равишда чўзиб келаётганини ҳисобламоқда. Шу боис Оқ уй Россияга нисбатан янги санкциялар жорий қилиш имкониятларини кўриб чиқмоқда. Улар орасида Россиянинг нефть экспортга қўйилган чекловларни четлаб ўтишига ёрдам бераётган «хуфёна флоти»га қарши чоралар кўриш ҳам бор.

Reuters манбаларига кўра, АҚШ ҳукумати Россияга нисбатан иқтисодий ва дипломатик босимни кучайтириш йўлларини муҳокама қилмоқда. Вашингтон Кремлнинг АҚШ босимига муросасиз муносабатда эканини ва музокараларга тайёр эмаслигини қайд этмоқда.

Оқ уй матбуот котибаси Кэролайн Левиттнинг таъкидлашича, президент Трамп ҳам Владимир Путин, ҳам Владимир Зеленскийдан умидини узган. Унинг сўзларига кўра, Трамп ушбу можарони имкон қадар тезроқ якунлашни истайди, чунки ҳар икки томонда ҳам инсонлар ҳалок бўлаяпти ва уруш жуда узоқ давом этмоқда.

«Президент бу можаро имкон қадар тезроқ якунланишини истайди. Ҳар икки томонда одамлар ҳалок бўлаяпти ва уруш жуда чўзилиб кетди. Бизнинг жамоа Россия ва Украина томонлари билан ҳамкорликни давом эттирмоқда», — деди Левитт.

30 март куни Трамп Зеленскийнинг сиёсий легитимлигини шубҳа остига қўйган Путиннинг сўзларидан норозилигини билдириб, агар Москва тинчлик келишувига рози бўлмаса, Россия нефти экспортига 25 фоизли иккинчи даражали божлар жорий қилиш билан таҳдид қилди.

Аввалроқ, сайловолди кампанияси давомида Трамп Украинадаги можарони 24 соат ичида тугатишга ваъда берган эди. Бироқ, Оқ уйга қайтгандан сўнг бу муддат сезиларли даражада узайтирилди. Financial Times нашрига кўра, Ғарб ва Украина расмийлари Трамп ва Путин ўт очишни тўхтатиш имкониятини Пасха (20 апрель) ёки 9 май арафасида муҳокама қилаётганини маълум қилган.

Шундай қилиб, Украина можароси ва Россияга нисбатан санкциялар масаласи АҚШ ташқи сиёсатининг марказий йўналишларидан бири бўлиб қолмоқда. Вашингтон Россияни босим орқали музокараларга мажбур қилишни режалаштираётган бир пайтда, урушнинг узоқ муддатга чўзилиши эҳтимоли ҳам ошиб бормоқда. “Замин” янгиликларини “Telegram”да кузатиб боринг