Эстония мудофаасини мустаҳкамлашга киришди: Россия билан чегарани миналаштиради

Эстония эҳтимолий ҳарбий таҳдидларга қарши туриш мақсадида Россия билан чегарада ҳимоя иншоотлари қуришни бошламоқда. Бу ҳақда мамлакат Мудофаа кучлари муҳандислик қўшинлари вакили Айнар Афанасев маълум қилди. Унга кўра, уруш юз берган тақдирда, Эстония чегара ҳудудларини миналаш ва стратегик объектларни йўқ қилиш чораларини кўради.

Мазкур ҳаракат Оттава конвенциясига зид бўлгани боис, расмий Таллин бу халқаро битимдан чиқишга қарор қилди. Афанасевнинг таъкидлашича, тинчлик даврида бундай чоралар кўрилмайди, аммо хавфсизлик таҳдиди мавжуд бўлган вазиятларда портловчи воситалардан фойдаланиш зарур бўлади.

Бункерлар ва мудофаа чизиғи

Эстония ҳукумати мудофаа чораларини кучайтириш доирасида 2024 йилдан бошлаб чегара ҳудудларида махсус бункерлар қуришни режалаштирган. Биринчи мудофаа нуқтаси Россия билан шимоли-шарқий чегарада ташкил этилади ва 14 та бункердан иборат бўлади. Шунингдек, яна тўртта бункер жануби-шарқий ҳудудларда ўрнатилади.

Мудофаа тизими доирасида барпо этиладиган иншоотлар 152 миллиметрли снарядларга бардош бера олиши режалаштирилган. Мудофаа кучлари вакилларининг маълум қилишича, синовдан ўтказилган иккита бункер бундай зарбаларига дош берган. Умуман олганда, мудофаа чизиғи бўйлаб 600 та панагоҳ қурилади ва улар хусусий ерларда ҳам жойлаштирилиши мумкин.

Украина тажрибасидан фойдаланиш

Эстония ҳимоя иншоотларини қуришда Украинадаги уруш тажрибасидан фойдаланмоқда. Бункерлар дрон ҳужумларига қарши махсус тўрлар ва бошқа ҳимоя воситалари билан жиҳозланади. Бу чоралар Россиянинг эҳтимолий ҳужумига қарши мудофаани мустаҳкамлашга хизмат қилади.

Эстония хавфсизлиги ва геосиёсий таҳдидлар

Эстония ҳукумати ва мудофаа идоралари Россияни мамлакат хавфсизлигига энг катта таҳдид деб ҳисоблайди. Мудофаа вазирлиги вице-канцлери маслаҳатчиси Кайдо Тийтуснинг фикрича, Украинадаги уруш Россиянинг ҳарбий салоҳиятини бироз пасайтирган, бироқ келгуси икки-уч йил ичида у ўз қудратини тиклаши мумкин. Шу сабабли, Эстония эҳтимолий ҳужумга қарши тайёргарлик кўриши ва мамлакат мудофаасини мустаҳкамлаши керак.

Миналар ва мудофаа сиёсати

2024 йил бошида Латвия, Литва ва Эстония эҳтимолий Россия тажовузига қарши мудофаани кучайтириш мақсадида Оттава конвенциясидан чиқиш имкониятини муҳокама қилган эди. Натижада, ушбу давлатлар пиёдаларга қарши миналар захирасини ошириш ва тинч аҳолига камроқ хавф туғдирадиган воситаларни кўпайтиришга қарор қилди.

Эстониянинг бундай ҳаракатлари мамлакат хавфсизлигини таъминлаш ва эҳтимолий ҳарбий таҳдидларга қарши тайёр туриш мақсадини кўзлаган. Россия билан чегарада ҳимоя иншоотларини қуриш ва миналаш орқали Таллин ўзига қарши ҳужумни имкон қадар қимматга туширишни мақсад қилган.