Жанубий Корея президентига нисбатан қарор ўз кучида қолди

Жанубий Корея президенти Юн Сок Ёл мамлакатда ҳарбий ҳолат эълон қилишга муваффақиятсиз уринганидан тўрт ой ўтиб, лавозимидан бутунлай четлатилди, деб BBC хабар берди. Конституциявий суд унинг импичменти ҳақидаги қарорни ўз кучида қолдирди.

Импичментни қўллаб-қувватлаш учун суднинг 8 аъзоси овоз берган. Улар ҳукм чиқариш вақтида президент ўз қарори билан конституция, қонун устуворлиги ва демократия тамойилларини бузганини таъкидлашган.

Эндиликда Жанубий Кореяда 60 кун ичида янги президентлик сайлови ўтказилиши лозим.

2024 йил декабрида Юн мамлакатда ҳарбий ҳолат эълон қилишга уриниб, парламент томонидан исёнга уринишда айбланган ва унга нисбатан импичмент эълон қилинган эди. Бу қарордан сўнг у вазифасидан четлатилган, аммо расман президентлик лавозимидан бутунлай четлаштириш Конституциявий суд қарорига боғлиқ эди.

Юн исёнга уриниш айбловларини рад этган ва бу қарор “сиёсий жиҳатдан текширилган” бўлиб, давлатни мухолифатдан ҳимоя қилиш учун қабул қилинганини айтган. Унинг адвокатлари эса суд жараёнини “ноқонуний ва адолатсиз” деб баҳолашган.

Март ойида Конституциявий суд Юн Сок Ёлни ҳибсдан озод қилган ва унга нисбатан чиқарилган ҳибс ордерини бекор қилган. “Замин” янгиликларини “Telegram”да кузатиб боринг