Трамп учта давлат билан божларни юмшатиш масаласида музокара бошлади

АҚШ президенти Дональд Трамп Вьетнам, Исроил ва Ҳиндистон билан божларни юмшатиш масаласида музокаралар олиб бормоқда. Бу ҳақда CNN ўз манбаларга таяниб хабар берди.

Маълумотларга кўра, Трамп ушбу давлатлар билан савдо муносабатларини қайта кўриб чиқиш ва божларни пасайтириш имконини берадиган савдо битимларини муҳокама қилган. Музокаралар давомида ҳар бир давлат учун алоҳида шартлар кўриб чиқилмоқда.

Исроил Бош вазири Бинямин Нетаняҳунинг 7 апрел куни Оқ уйга ташрифи чоғида мазкур масалани шахсан муҳокама қилиши кутилмоқда. Бу ҳақда Axios нашри хабар берди.

Эслатиб ўтамиз, 2 апрел куни Трамп расман Вьетнам, Исроил ва Ҳиндистондан АҚШга импорт қилинадиган товарларга янги божлар жорий этганини маълум қилган эди. Яъни:

- Исроил маҳсулотларига — 17%,
- Вьетнам маҳсулотларига — 46%,
- Ҳиндистон маҳсулотларига — 26% бож белгиланган.

Ушбу чоралар халқаро савдо алоқаларига қандай таъсир кўрсатиши ва музокаралар қандай натижа бериши ҳозирча ноаниқ. Аммо экспертлар бу жараёнлар АҚШнинг ташқи савдо сиёсатида муҳим бурилиш бўлиши мумкинлигини таъкидламоқда.