Трампга Кремль шартларини етказган вакил: Россия тинчлик эвазига ҳудудларни талаб қилмоқда

Reuters агентлигининг хабар беришича, АҚШ президенти Доналд Трампга Кремлнинг Украина бўйича шартлари етказилган. Бу АҚШ махсус вакили Стив Уиткофф томонидан амалга оширилган.

Дмитриев — Уиткофф — Трамп занжири
Уиткофф Россия президентининг махсус вакили Кирилл Дмитриев билан Вашингтонда учрашув ўтказган. Ушбу учрашувдан сўнг, у Кремлнинг талабини Трампга етказган — Россия Донецк, Луганск, Запорожжя ва Херсон устидан назоратни расман олиши керак, деган шарт қўйилган.

Уиткоффнинг таъкидлашича, ушбу шарт қабул қилинса, тинчлик шартномаси тезроқ имзоланиши мумкин.

АҚШда норозилик
Бироқ Трампнинг Украина бўйича бошқа махсус вакили — генерал Кит Келлог Уиткоффнинг позициясини қўллаб-қувватламаган.

Келлог фикрича, Украина айрим шартларга рози бўлиши мумкин, лекин ҳеч қачон ҳудудларни бир томонлама тартибда Россияга бериб юбормайди.

Трамп атрофидаги ихтилофлар
Reuters таъкидлашича, Кремл томонидан илгари сурилаётган шартлар Трамп маъмурияти ичида низоларни кучайтирмоқда. Айрим республикачилар Уиткоффни "ҳаддан ташқари россияпараст" позицияда бўлганликда айбламоқда.

Кирилл Дмитриевнинг апрел ойида Вашингтонга қилган ташрифи — уруш бошланганидан бери Россия расмий вакилининг АҚШга биринчи юқори даражадаги ташрифи ҳисобланади.

Уиткофф — Россияга уч марта борган шахс
Маълумотларга кўра, Стив Уиткофф сўнгги икки ой ичида Россияга уч марта ташриф буюрган. 11 апрель куни эса у Санкт-Петербургда Владимир Путин билан бевосита учрашган.

Сиз нима деб ўйлайсиз — Трамп Кремл шартларига кўнса, бу АҚШ ташқи сиёсатини ўзгартириши мумкинми? «Замин»ни Telegram’да ўқинг!