Россия қуролли кучларининг 448-ракета бригадаси зарбага учради

Украина Қуролли Кучлари 13 апрелда Сумига қилинган ракетали зарба учун жавоб сифатида Россиянинг Курск вилоятида жойлашган 448-ракета бригадасига ҳужум уюштирди.

Украина Бош штаби маълумотича, ҳужум 15 апрел куни амалга оширилган. Сумига қилинган зарба билан боғлиқ «қатор объектлар» нишонга олинган. 448-бригадага зарба берилганда ўқ-дориларнинг «иккиламчи портлаши» кузатилган. Ҳозирча зарба оқибатлари аниқлаштирилмоқда.

Россия Мудофаа вазирлиги бу ҳужум ҳақида изоҳ бермаган. Шу билан бирга, Россия томони Курск вилоятида 109 та дрон уриб туширилганини маълум қилган. УУА ҳужуми натижасида бир киши ҳалок бўлган, тўққиз киши яраланган, уйлар ва автомобилларга зарар етган.

Эслатиб ўтамиз, 13 апрел куни Россия Суми марказига иккита «Искандер-М» ракетаси билан зарба бериб, 35 киши ҳалок бўлган эди. Россия Мудофаа вазирлиги бу зарбани «Северск» гуруҳи қўмондонлик йиғилишига қаратилиб берилганини айтган. «Замин»ни Telegram’да ўқинг!