АҚШ урушга аралашишдан воз кечдими? Исроил режаси фош бўлди

The New York Times нашри маълум қилишича, АҚШ собиқ президенти Дональд Трамп Исроил томонидан май ойида Эрон ядровий объектларига режалаштирилган зарбани қўллаб-қувватлашдан бош тортган. Бу қарор бир неча ой давом этган ички муҳокамалар ва сиёсий тортишувлардан кейин қабул қилинган.

Манбаларга кўра, Трамп Эрон билан олиб борилаётган ядровий музокараларга зиён етказмасликни афзал кўрган. Унинг олдида икки йўл бор эди: дипломатик ҳал этиш ёки Исроилнинг ҳарбий сценарийсини қўллаб-қувватлаш. Оқ уй эса биринчи вариантни маъқул кўрди.

АҚШ маъмуриятида ички ихтилоф

Ҳарбий таҳдид масаласи АҚШ ҳукумати ичида кескин қарама-қаршиликларни келтириб чиқарган. Қатор вазирликлар ҳарбий чораларни ёқлаб чиққан бўлса, Трампнинг ёрдамчилари ҳужум натижасига шубҳа билан қараган. Улар Эронга берилган зарба АҚШни кенг қамровли урушга тортиб кетиши мумкинлигини таъкидлашган.

Охир-оқибат, умумий фикр ҳарбий ҳаракатлардан тийилиш томонга оғган. Бу вақтда Эрон томони ўзини музокараларга очиқ эканини билдирган.

Исроил ҳужумга тайёр эди

Исроил матбуоти ва халқаро манбалар хабар беришича, Исроил мудофаа тузилмалари Эрон ядро инфратузилмасини зарба билан йўқ қилиш бўйича аниқ режаларни ишлаб чиққан. Бу зарбалар Теҳроннинг ядро дастурини камида бир йилга кечиктириш мақсадини кўзлаган.

Ушбу режаларнинг деярли барчаси АҚШнинг бевосита иштирокини назарда тутган — хавфсизлик кафолати, ҳаво ҳужуми самарадорлиги ва Эроннинг эҳтимолий жавобига қарши қўллаб-қувватлаш.

Айтиш жоизки, Исроилга аллақачон АҚШ томонидан оғир турдаги бомбалар — хусусан, МК-84 бомбалар етказилган. Шунингдек, 3 000 дан ортиқ ракета ва бошқа ҳужум қуроллари юбориш учун тайёрланмоқда.

Трампнинг президентлиги давридаги қўпол, лекин эҳтиёткор ёндашув бу гал ҳам ўзини намоён қилди. Сиёсий таҳлилчилар фикрича, у дипломатик ечимни устун кўриб, АҚШни тўғридан-тўғри урушга тортишдан сақланган. «Замин»ни Telegram’да ўқинг!