АҚШ Қримни Россияга топширмоқчи: Украина қандай йўл тутади?

23 апрель куни Буюк Британия пойтахти Лондонда бўлиб ўтадиган халқаро музокараларда АҚШ делегацияси Украина ва Европа вакилларига Қрим яриморолини расман Россия ҳудуди сифатида тан олиш ва фронт чизиғини музлатиш бўйича ўзининг таклифларини билдиради. Бу ҳақда The Washington Post газетаси бир неча ишончли манбасига таянган ҳолда хабар тарқатди.

Америка Қўшма Штатлари тинчлик сулҳига эришиш учун Қримни Россиянинг бир қисми сифатида тан олишга тайёрлиги ҳақида олдинроқ Bloomberg агентлиги ҳам ёзган эди. Шунингдек, The Wall Street Journal нашрининг маълум қилишича, 17 апрель куни Парижда бўлиб ўтган музокараларда АҚШ томонидан бу таклиф Европа иттифоқчилари ҳамда Украина делегацияларига етказилган.

Лондондаги учрашув олдидан тарқалган маълумотларга кўра, АҚШнинг таклифи Қримни расман Россия ҳудуди сифатида тан олишни ва келажакда Москвага нисбатан киритилган санкцияларни бекор қилишни ҳам ўз ичига олади. Бунинг эвазига эса Россия Украина ҳудудидаги ҳарбий ҳаракатларни тўлиқ тўхтатиши лозим.

Украина президенти маслаҳатчиларидан бирининг айтишича, Америка томони тақдим этган бу режада Киевнинг ҳам қабул қилиши мумкин бўлган, ҳам қабул қилиши мумкин бўлмаган таклифлар мавжуд. Ғарбнинг юқори мансабдор шахсларидан бири эса бу масалада Вашингтон томонидан Украинага кўрсатилаётган босимни «ҳайратланарли даражада кучли» деб баҳоламоқда.

The Washington Post газетасининг таъкидлашича, Украина иттифоқчилари мамлакатдан ҳудудий ён беришларни талаб қилиш эвазига унга хавфсизлик кафолатлари ва тикланиш бўйича катта миқёсдаги иқтисодий дастурларни ваъда қилмоқда.

Ҳозирда бутун жаҳон ҳамжамиятининг кўзлари айнан Лондондаги ушбу тарихий учрашув натижаларига қаратилган бўлиб, унинг якуни нафақат Украина ёки Россия учун, балки бутун Европа ва глобал сиёсатнинг келажаги учун ҳам муҳим аҳамият касб этади. «Замин»ни Telegram’да ўқинг!