Россия Украина бўйича АҚШ билан келишувга тайёрлигини билдирди

Россия ташқи ишлар вазири Сергей Лавров АҚШ билан Украина бўйича тинчлик келишувига эришишга тайёрлигини маълум қилди, деб хабар бермоқда CBS. Бироқ у мазкур келишувнинг баъзи жиҳатлари ҳали тўлиқ ишлаб чиқилмаганини ва қайта кўриб чиқишга муҳтожлигини урғулади.

«АҚШ президенти келишувнинг аниқ шартлари ва тафсилотларини эълон қилмаган, шу сабабли мен ҳам бу ҳақда ҳозирча гапирмайман. АҚШ раҳбарининг баёнотидан келиб чиқиб айтадиган бўлсак, биз тўғри йўналишдамиз. Биз келишувга тайёрмиз, аммо баъзи жиҳатларни янада такомиллаштириш керак», – деди Лавров.

Шунингдек, Лавров «Украинадаги вазият» бўйича Америка билан мулоқот давом этаётганини маълум қилди.

Россия ташқи ишлар вазирига кўра, АҚШ президенти Доналд Трамп бу можаронинг келиб чиқиш сабабларини тан олган ягона йирик давлат раҳбари бўлиши мумкин. «Президент Трамп Украинани НАТОга жалб қилишга бўлган уринишни жиддий хатолик сифатида баҳолади. Бу хатони Байден маъмурияти содир этган ва ҳозир АҚШ буни тузатмоқчи», – деб таъкидлади Лавров.

Трамп фикрича, Украина можароси бўйича тинчлик келишуви йўлида маълум даражада олдинга силжиш мавжуд. Аммо CBS мухбирининг «Украина тинчлик эвазига ўз ҳудудининг бир қисмини Россияга беришга мажбур бўладими?» деган саволига АҚШ президенти қуйидагича жавоб берган:

«Бу қайси ҳудуд экани билан боғлиқ... Биз Украина билан ишлашни давом эттирамиз, аммо улар аллақачон кўплаб ҳудудларини йўқотган», – деди Трамп. Унинг фикрича, Россия ҳарбий кучларининг Украинанинг бутун ҳудудини босиб олмагани ҳам Россия томонидан қилинган муайян ён бериш деб баҳоланиши мумкин.

Украинанинг тинчлик формуласи қандай?

Украина томони урушнинг тўлиқ якунланиши учун Россия қўшинлари 1991 йилги чегараларга қайтишини талаб қилмоқда. Бунда 2014 ва 2022 йилларда Россия томонидан аннексия қилинган Қрим, Донецк, Луганск, Херсон ва Запорожье вилоятлари назарда тутилган. Шунингдек, Украина тинчлик эришилгандан кейин Россия томонидан яна ҳужумлар амалга оширилмаслиги учун халқаро хавфсизлик кафолатлари берилишини талаб қиляпти. Бу эса Украинага халқаро тинчликпарвар кучларнинг жойлаштирилишини англатади. Москва эса Украина таклиф қилган «тинчлик формуласи» бўйича музокаралар олиб бориш имкониятини рад этган ҳамда хорижий кучларнинг Украина ҳудудига киритилишига қарши эканини маълум қилган.

Россиянинг шартлари қандай?

Россия президенти Владимир Путин урушни тўхтатиш учун бир қатор талабларни илгари сурди. Унга кўра, Украина ҳарбий кучлари ўзини мустақил деб эълон қилган Донецк ва Луганск халқ республикалари, Херсон ва Запорожье вилоятлари ҳудудларидан олиб чиқилиши лозим. Бундан ташқари, мазкур тўрт вилоят ҳамда Қрим яримороли халқаро ҳамжамият томонидан Россия ҳудуди сифатида тан олиниши, Украинанинг НАТОга қўшилиш режасидан воз кечиши ва Россияга нисбатан киритилган санкцияларнинг бекор қилиниши талаб қилинмоқда. Украина президенти Владимир Зеленский эса бу талабларни «қабул қилиб бўлмас ва ишончсиз ультиматум» деб атаган.

Ҳозирда халқаро жамоатчилик Украина ва Россия ўртасидаги можарони дипломатик йўл билан ҳал қилишга чақирмоқда. Бироқ икки томон ўртасидаги музокаралар ва келишувлар ҳозирча жиддий натижа бермаган. «Замин»ни Telegram’да ўқинг!