Трамп: Украина НАТОга интилиб, урушни ўзи бошлаб берди

АҚШ президенти Доналд Трамп Украина НАТО аъзолигига интилиши Россия билан можарога сабаб бўлганини маълум қилди. У бу ҳақда Time журналига Оқ уй раҳбари сифатида иш бошлаганининг 100 кунлиги муносабати билан берган интервьюсида айтиб ўтди.

Трамп суҳбатда Украина НАТОга қўшилиш имконига эга эмаслигини таъкидлаб, айнан шу мавзудаги гап-сўзлар урушнинг бошланишига туртки бўлганини қайд этди.

«Украинанинг НАТОга киришига ҳеч қандай имкон йўқ. Урушнинг сабаби ҳам айнан шу – Украина НАТОга қўшилишни хоҳлай бошлаганидан келиб чиқди», — деди Америка раҳбари интервью давомида.

Унинг фикрича, агар НАТО аъзолиги мавзуси муҳокама қилинмаганида, эҳтимол, бугунги кундаги можаро содир бўлмаган бўларди.

«Агар бу масала кўтарилмаганида, можаро бошланмаслиги эҳтимоли каттароқ бўларди», — деб қўшимча қилди Трамп.

Шунингдек, АҚШ раҳбари можаро тинч йўл билан ҳал қилинганидан кейин ҳам Қрим яримороли Россия таркибида қолишини айтиб ўтди.

«Биз Қрим ҳақида гапиришимиз керак, чунки бу масала доимо кўтарилади. Қрим Россия таркибида қолади. Буни Украина президенти Владимир Зеленский ҳам, бошқалар ҳам жуда яхши тушунади. Чунки Қрим анчадан буён Россиянинг бир қисми бўлиб келмоқда», — деди у.

Трамп суҳбат давомида Украина можаросини фақат ўзи тинч йўл билан ҳал қилишга қодир эканини таъкидлади.

«Биз музокараларни жуда яхши ўтказдик ва келишувга яқинмиз. Менинг фикримча, бу келишувни мендан бошқа ҳеч ким амалга ошира олмайди», — дея қайд этди Трамп.

У интервью давомида тинчлик битими бўйича келишувга эришиш имконияти фақат ўзига тегишли эканига ишонч билдирди.

«Музокаралар орқали тинчликни фақат мен ўрната оламан деб ўйлайман. Бошқа биров бу келишувни амалга ошириши мумкинлигига ишонмайман», — дея таъкидлади Доналд Трамп. «Замин»ни Telegram’да ўқинг!