Путин ва АҚШ элчиси яна музокара столига ўтирди: тинчлик яқинми?

Россия президенти Владимир Путин ва АҚШнинг махсус вакили Стив Уиткофф Кремлда навбатдаги музокараларни ўтказди. Бу ҳақда Россия давлат раҳбарининг матбуот котиби Дмитрий Песков маълум қилди. Томонлар учрашувда икки давлат ўртасидаги муҳим масалалар ва Украина бўйича Доналд Трамп таклиф қилган тинчлик режасини муҳокама қилган.

Путин билан учрашувдан ташқари, Уиткофф президентнинг ёрдамчиси Юрий Ушаков ҳамда Россиянинг инвестиция ва иқтисодий ҳамкорлик бўйича махсус вакили Кирилл Дмитриев билан ҳам мулоқот ўтказган. Учрашувдан олдин америкалик дипломат Дмитриев билан бирга Москва марказида қисқа сайр уюштиргани ҳам айтилмоқда, деб хабар берди «Интерфакс».

Эслатиб ўтамиз, Стив Уиткофф АҚШ томонидан Россия билан асосий музокарачи сифатида иш олиб бормоқда ва бу унинг Владимир Путин билан ўтказган тўртинчи учрашувидир. Улар охирги марта жорий йилнинг 11 апрель куни Санкт-Петербург шаҳрида мулоқот қилган эди.

Бироқ Москва Доналд Трамп томонидан ишлаб чиқилган тинчлик таклифини қандай баҳолаши ҳақида ҳали ҳам очиқ позиция билдиргани йўқ. Россия расмийлари ҳам, оммавий ахборот воситалари ҳам бу режанинг асосий жиҳатлари борасида маълумотларни эълон қилмаяпти. Кремль вакили Дмитрий Песков мунтазам равишда музокараларнинг ёпиқ форматда олиб борилиши кераклигини таъкидлаб келмоқда. Шу билан бирга, Россиянинг бир жиҳат бўйича позицияси аниқ: Москва Европа мамлакатларининг Украина ҳудудида тинчликпарвар кучларини жойлаштириш режасига қатъий қарши чиқмоқда.

Айни вақтда, Америкадаги CBS телеканали Россия ташқи ишлар вазири Сергей Лавров билан бўлиб ўтган интервьюдан қисқа парча эълон қилди. Тўлиқ суҳбат эфирга якшанба куни узатилади. Интервьюда Лавров Трампнинг «томонлар тўғри йўналишда кетаётгани» ҳақидаги фикрини тасдиқлаган ва Россиянинг «битимга тайёр эканлиги», аммо бу келишувнинг айрим жиҳатлари қайта кўриб чиқилишини талаб қилишини урғулаган. Лавров ҳозирда икки томон бу масалалар устида иш олиб бораётганини таъкидлаган.

Ҳозирча икки томон ўртасидаги музокараларнинг якуний натижалари нима бўлиши номаълум. Аммо охирги вақтлардаги фаол дипломатик ҳаракатлар Москва ва Вашингтоннинг Украина бўйича келишувга яқинлашганини кўрсатмоқда. «Замин»ни Telegram’да ўқинг!