Зеленский: «Қрим — Украина, бу масала муҳокама қилинмайди!»

Украина президенти Владимир Зеленский мамлакат учун энг муҳим масалалардан бири ҳисобланган Қрим яримороли бўйича кескин позициясини яна бир бор баён қилди. Унга кўра, Қрим масаласи Россия билан тўлиқ ва кафолатланган тарзда ўт очиш тўхтатилганидан кейин муҳокама қилинадиган мавзудир. Зеленскийнинг бу баёноти АҚШ президенти Дональд Трамп томонидан таклиф қилинган тинчлик режасига берилган жавоб бўлди.

«Ҳудудлар билан боғлиқ ҳар қандай масалани кўтариш учун бизда санкциялар, дипломатик ва иқтисодий босим қилиш механизмлари бор. Лекин бунинг учун биринчи навбатда уруш тўлиқ тўхташи керак. Шундан кейингина биз барча масалалар ҳақида гаплашишимиз мумкин бўлади», – деди Зеленский матбуот анжуманида.

Украина етакчиси АҚШ президенти Дональд Трамп билан бир жиҳатда тўлиқ ҳамфикр эканини таъкидлади: Украина айни пайтда Қримни куч билан қайтариб олиш учун етарли қурол-яроғга эга эмас. Бироқ, у бу ҳудудлардан воз кечиш ҳақида ҳеч қандай гап бўлиши мумкин эмаслигини қатъий билдирган.

«Қрим ҳам, вақтинча босиб олинган бошқа ҳудудлар ҳам – бу Украинадир. Конституциямизда ҳам айнан шу нарса ёзилган. Бу позициямиз ўзгармас ва аниқ. Бизнинг бу фикримизни жаҳон ҳамжамиятининг катта қисми қўллаб-қувватлайди. Ҳатто Россия билан Украина ўртасида нейтраллик сақлашга ҳаракат қилувчи мамлакатлар ҳам бизнинг ҳудудий яхлитлигимизни тан олади», – дея тушунтирди Зеленский.

Эслатиб ўтамиз, 17 апрель куни АҚШ маъмурияти томонидан Украина делегациясига Дональд Трамп томонидан ишлаб чиқилган тинчлик режаси тақдим этилганди. Бу ҳужжат АҚШнинг дипломатик воситачилик қилиш бўйича «сўнгги таклифи» ҳисобланади ва унинг энг баҳсли бандларидан бири – Қрим устидан Россия назоратини тан олиш масаласидир.

АҚШ режасига кўра, Украина агар бу таклифни рад этса, АҚШ Киев ва Москва ўртасидаги воситачиликдан воз кечиши мумкинлиги айтилган. Трамп эса, ўз навбатида, Зеленскийнинг «Қрим Украина халқининг еридир» деган баёнотини кескин танқид қилиб, бу фикр тинчлик музокараларига зарар етказиши мумкинлигини таъкидлаган.

Зеленский мазкур танқидларга жавоб бериб, Украина ҳар доим ўз Конституциясига ва халқининг хоҳиш-иродасига мувофиқ ҳаракат қилишини, халқаро ҳамкорлар, айниқса АҚШ, ҳам Украина ҳудудий яхлитлигини ҳимоя қилишда қатъий қарорлар қабул қилишига ишонишини билдирди.

Шу билан бирга, Зеленский Украина ҳар қандай форматда, ҳар қандай вақтда ва ҳар қандай давлат билан мулоқотга тайёр эканини яна бир бор таъкидлади. Лекин бу музокараларда ҳеч қачон Украина ҳудудларининг қайси бири Россияга тегишли эканлиги ҳақида гап бўлмаслигини маълум қилди.

Украина ва Россия ўртасидаги музокаралар келгуси ҳафталарда халқаро ҳамжамият эътиборида бўлиши кутилмоқда. Зеленскийнинг қатъий баёноти эса Украина позицияси ўзгармаслигидан далолат беради. «Замин»ни Telegram’да ўқинг!