АҚШ 18 давлат билан савдо музокараларига тайёргарлик кўрмоқда: тарифлар юмшатилиши мумкинми?

АҚШ Савдо вакиллиги мамлакатнинг савдо сиёсатида катта ўзгаришларга сабаб бўлиши мумкин бўлган янги схема устида иш бошлади. Унга кўра, АҚШ 18 давлат билан савдо тарифларини босқичма-босқич юмшатиш бўйича музокаралар ўтказишни режалаштирмоқда, деб хабар бермоқда The Wall Street Journal (WSJ).

Ушбу режа орқали бож тўловлари, импорт квоталари, тарифсиз савдо тўсиқлари, товарларнинг келиб чиқиши, рақамли савдо ва иқтисодий хавфсизлик каби масалалар муҳокама қилинади. Лекин манбаларнинг таъкидлашича, ҳужжат якуний шаклга келгунча ўзгариши мумкин.

АҚШ ушбу схема доирасида айрим мамлакатларга нисбатан махсус талабларни ишлаб чиқади ва икки ой давомида йирик савдо ҳамкорлари билан муҳокамалар олиб борилади. Музокараларнинг бошланиши 8 июл кунига мўлжалланган — бу кун президент Доналд Трампнинг кенг қамровли савдо тарифларини жорий қилишни ортга сурган 90 кунлик муддати якунланади. Агар музокаралар натижалари томонларни қониқтирмаса, АҚШ ушбу давлатларга қарши тарифларни кучга киритиши мумкин.

Оқ уй матбуот котиби Кэролин Левитт аввалроқ ҳукумат 18 мамлакатдан таклиф олганини тасдиқлаган эди, лекин бу давлатлар рўйхатини очиқламаган. WSJ нашрининг тахмин қилишича, бу давлатлар орасида Канада, Мексика ва Хитой бўлиши даргумон. Сабаби шундаки, АҚШнинг жорий қилган кенг қамровли савдо чекловлари бу мамлакатларга тегишли эмас эди.

Айниқса, Пекин ва Вашингтон ўртасидаги савдо уруши охирги пайтда кучайган: АҚШ Хитой товарларига нисбатан тарифларни 145 фоизгача кўтарган бўлса, Хитой бунга жавобан Америка маҳсулотларига 125 фоизлик бож ўрнатди. Шунингдек, Пекин АҚШга муҳим фойдали қазилмалар экспортига чекловлар ҳам киритди.

Нашрнинг хабар беришича, Трамп маъмурияти айни вақтда Хитой билан вазиятни юмшатиш мақсадида божларни 50–65 фоизгача пасайтириш масаласини кўриб чиқмоқда. Аммо президент Трампнинг ўзи агар Пекин «жиддий ва аниқ» таклиф билан чиқмаса, тарифларни бир томонлама юмшатмаслигини ҳам таъкидлаган.

Яқин ойларда бўлиб ўтадиган музокаралар халқаро савдо муносабатларида жиддий бурилиш нуқтаси бўлиши мумкин. Ҳозирча бу савдо «сулҳи» режаси қандай якун топиши номаълум, аммо иқтисодий таҳлилчилар бу жараёнлар глобал бозорларга ижобий таъсир кўрсатишига умид билдиришмоқда.

Янгиликлар